رەسەي اۋعانستاندى باقىلاۋدا ۇستاپ وتىرعان «تاليبان» قوزعالىسىنا 27 مامىردا قول قويىلعان اسكەري-تەحنيكالىق ىنتىماقتاستىق تۋرالى كەلىسىم اياسىندا كەڭەستىك اسكەري تەحنيكانى قالپىنا كەلتىرۋدى ۇسىندى. بۇل تۋرالى رەسەي پرەزيدەنتىنىڭ اۋعانستان جونىندەگى ارنايى وكىلى زامير كابۋلوۆ مالىمدەدى، دەپ حابارلايدى «ادىرنا» ءتىلشىسى.
1989 جىلى كەڭەس اسكەرى اۋعانستاننان شىعارىلعاننان كەيىن ەلدە قانشا اسكەري تەحنيكا قالعانى ناقتى بەلگىسىز. The Moscow Times باسىلىمى اۋعانستان قورعانىس مينيسترلىگى مەن Military Balance دەرەكتەرىنە سۇيەنە وتىرىپ، تاليبتەردىڭ قولىندا ءالى دە ونداعان ت-55 جانە ت-62 تانكى، بمپ-1 جانە بمپ-2 جاياۋ اسكەردىڭ جاۋىنگەرلىك ماشينالارى، مي-17 جانە مي-24 تىكۇشاقتارى، ءۇش ان-26 جانە ءبىر ان-32 اسكەري-كولىك ۇشاعى، سونداي-اق مينومەتتەر مەن اتىس قارۋلارى بار ەكەنىن جازدى.
سوڭعى جىلدارى «تاليبان» وسى تەحنيكانىڭ ءبىر بولىگىن قالپىنا كەلتىرۋگە ارەكەت جاساپ كەلەدى. Defense Express مالىمەتىنشە، 2023 جىلدىڭ قىركۇيەگىندە تاليبتەر جوندەۋدەن وتكەن ونداعان ت-55 جانە ت-62 تانكى، بمپ-1 ماشينالارى مەن مي-24 تىكۇشاقتارى كورسەتىلگەن بەينەروليك جاريالاعان.
باسىلىمنىڭ اتاپ وتۋىنشە، وندىرىستىك بازاسى، ماماندارى نەمەسە قوسالقى بولشەكتەرى جوق تالىپتەر ەسكى كەڭەستىك تەحنيكانى ءوز كۇشىمەن قالپىنا كەلتىرە الماس ەدى. بۇل ىسكە رەسەيدىڭ دە قاتىسى بولۋى مۇمكىن. ماسەلەن، مي-24 تىكۇشاعىن پايدالانۋ ءۇشىن تەك ۇشقىشتاردى عانا ەمەس، ونى تەحنيكالىق قىزمەت كورسەتەتىن مامانداردى دا دايارلاۋ قاجەت.
مامىر ايىنىڭ سوڭىندا جاسالعان كەلىسىمنىڭ ناقتى شارتتارى جاريالانعان جوق. كابۋلوۆ قۇجاتتىڭ جالپى سيپاتتاعى كەلىسىم ەكەنىن، الايدا وندا ءارتۇرلى جۇيەلەردى جەتكىزۋگە ارنالعان كەلىسىمشارتتار جاساۋ مۇمكىندىگى قاراستىرىلعانىن ايتتى.
ساراپشىلاردىڭ پىكىرىنشە، ماسكەۋ مەن «تاليبان» اراسىنداعى ىنتىماقتاستىقتىڭ نەگىزگى باعىتتارى ءىرى كولەمدەگى قارۋ-جاراق جەتكىزۋ ەمەس، تەحنيكالىق قىزمەت كورسەتۋ، ۇيلەستىرۋ جانە كادر دايارلاۋ بولۋى ىقتيمال.
ۆاشينگتونداعى Atlantic Council ساراپتامالىق ورتالىعىنىڭ اعا عىلىمي قىزمەتكەرى حاميد حاكيميدىڭ ايتۋىنشا، تالىپتەر ۇكىمەتىنىڭ ماسكەۋ ءۇشىن ماڭىزدى اسكەري سەرىكتەس دەڭگەيىندە قارۋ-جاراق ساتىپ الۋعا جەتكىلىكتى قارجىلىق مۇمكىندىگى جوق.
«تاليبان» قوزعالىسى اقش پەن ەۋروپالىق وداقتا تەرروريستىك ۇيىم رەتىندە تانىلعان. 2024 جىلدىڭ جەلتوقسانىندا رەسەي مەملەكەتتىك دۋماسى «تاليباندى» تەرروريستىك ۇيىمدار تىزىمىنەن شىعارۋعا مۇمكىندىك بەرەتىن زاڭ قابىلداپ، وعان پرەزيدەنت ۆلاديمير پۋتين قول قويعان. ال 2025 جىلدىڭ ساۋىرىندە رەسەيدىڭ جوعارعى سوتى قوزعالىس قىزمەتىنە سالىنعان تىيىمنىڭ كۇشىن توقتاتتى.
