بىرىككەن ۇلتتار ۇيىمى ليۆان، گازا سەكتورى جانە يەمەندەگى گۋمانيتارلىق احۋالدىڭ كۇرت ناشارلاپ بارا جاتقانى تۋرالى اقپارات تاراتتى، دەپ حابارلايدى "ادىرنا" ۇلتتىق پورتالى.
ۇيىمنىڭ دەرەگىنشە، وڭىرلەردە ميلليونداعان ادام ازىق-تۇلىك پەن مەديتسينالىق كومەككە مۇقتاج بولىپ وتىر.
بۇۇ باس حاتشىسى انتونيۋ گۋتەرريش اقش پەن يران اراسىنداعى شيەلەنىستىڭ كۇشەيۋىنە جانە وڭىردەگى تۇراقسىزدىقتىڭ ارتۋىنا الاڭداۋشىلىق ءبىلدىردى. ونىڭ ايتۋىنشا، قارۋلى قاقتىعىستار سالدارىنان بەيبىت تۇرعىندار زارداپ شەگىپ، گۋمانيتارلىق جاعداي كۇردەلەنە تۇسكەن.
گۋتەرريش تاراپتاردى سابىر ساقتاۋعا جانە جاعدايدىڭ ودان ءارى ۋشىعۋىنا جول بەرمەۋگە شاقىردى. سونىمەن قاتار حالىقارالىق گۋمانيتارلىق قۇقىق نورمالارىن ساقتاۋدىڭ ماڭىزىن اتاپ ءوتتى.
بۇۇ مالىمەتىنشە، يزرايل ارمياسىنىڭ ەۆاكۋاتسيا تۋرالى بۇيرىعىنان كەيىن بەيرۋتتىڭ وڭتۇستىك اۋداندارىنان شامامەن 200 مىڭ ادام كوشىپ كەتكەن. قازىرگى ۋاقىتتا 135 مىڭعا جۋىق ادام ۋاقىتشا ورنالاستىرۋ ورتالىقتارىندا تىركەلگەن. الايدا ورتالىقتاردىڭ كوپشىلىگى لىق تولعاندىقتان، مىڭداعان تۇرعىن اشىق اسپان استىندا تۇنەۋگە ءماجبۇر.
ليۆان دەنساۋلىق ساقتاۋ مينيسترلىگىنىڭ مالىمەتىنە سايكەس، سوڭعى اۋە شابۋىلدارى سالدارىنان بەس ادام قازا تاۋىپ، 48 ادام جارالانعان. زارداپ شەككەندەردىڭ اراسىندا مەديتسينا قىزمەتكەرلەرى دە بار.
ال گازا سەكتورىندا گۋمانيتارلىق جۇكتەردى جەتكىزۋ جۇمىستارى قيىندىقتارعا ۇشىراپ وتىر. «كەرەم-شالوم» وتكىزۋ بەكەتىندەگى كىدىرىستەرگە بايلانىستى اۋرۋحانالار مەن سۋ تۇششىلاندىرۋ قوندىرعىلارىنا ارنالعان جانارماي جەتكىزىلمەگەن. سوعان قاراماستان حالىقارالىق ۇيىمدار ايماققا ءدارى-دارمەك، گيگيەنالىق قۇرالدار، شاتىرلار مەن كورپەلەر تيەلگەن مىڭنان استام جۇك كونتەينەرىن جەتكىزگەن.
دۇنيەجۇزىلىك دەنساۋلىق ساقتاۋ ۇيىمىنىڭ قولداۋىمەن سوڭعى ەكى اپتادا گازادان شەتەلدە ەمدەلۋگە مۇقتاج جۇزگە جۋىق ناۋقاس ەۆاكۋاتسيالانعان. الايدا مىڭداعان ادام ءالى دە مامانداندىرىلعان مەديتسينالىق كومەككە ءزارۋ.
بۇۇ يەمەندەگى ازىق-تۇلىك داعدارىسىنىڭ دا تەرەڭدەپ بارا جاتقانىن حابارلادى. ۇيىمنىڭ باعالاۋىنشا، ەلدىڭ ۇكىمەت باقىلاۋىنداعى اۋماقتارىندا شامامەن بەس ميلليون ادام ازىق-تۇلىك تاپشىلىعىنان زارداپ شەگىپ وتىر.
ماۋسىم مەن قىركۇيەك ارالىعىندا بۇل كورسەتكىش 5,4 ميلليون ادامعا دەيىن ءوسۋى مۇمكىن.
بۇۇ اگەنتتىكتەرى حالىقارالىق قاۋىمداستىقتى شۇعىل قارجىلاي قولداۋ كورسەتۋگە شاقىردى. ۇيىم 2026 جىلعا ارنالعان گۋمانيتارلىق جوسپار اياسىندا يەمەندەگى 12 ميلليون تۇرعىنعا كومەك كورسەتۋ ءۇشىن 2,16 ميلليارد دوللار كولەمىندە قارجى قاجەت ەكەنىن مالىمدەدى.
