قارقارالىلىقتار ەلىمىزدەگى ەڭ ۇزدىك قىمىز وندىرۋشىلەردىڭ ءبىرى ەكەنىن تاعى ءبىر مارتە دالەلدەپ وتىر. وتكەن جىلى استانادا وتكەن العاشقى «BaiQymyz» فەستيۆالىندە تەگىسشىلدىك اۋىلىنداعى «قارىنشي» شارۋا قوجالىعى جۇلدەگەرلەر قاتارىنان كورىنگەن بولاتىن. ال بيىل ۇلى دالانىڭ قاسيەتتى سۋسىنىنا ارنالعان اۋقىمدى مەرەكەنى قارقارالى اۋدانىنىڭ ءوزى قابىلداۋدا.
العاش رەت ۇيىمداستىرىلىپ وتىرعان وڭىرارالىق «BaiQymyz-2026» ەتنو-گاستروفەستيۆالى قاراعاندى وبلىسى اكىمدىگىنىڭ قولداۋىمەن جانە دەمەۋشىلەر — Eurasian Resources Group (ERG) مەن Integra Construction KZ حولدينگىنىڭ قولداۋىمەن وتۋدە.
اۋقىمدى مەرەكە قازاقستاننىڭ ءار وڭىرىنەن، سونداي-اق رەسەي مەن قىرعىزستاننان كەلگەن مىڭداعان قوناقتىڭ باسىن قوستى.
قارقارالى ماڭىنداعى كوركەم تابيعات اياسىندا 27 اق شاڭقان كيىز ءۇي مەن شاتىردان قۇرالعان ەتنواۋىل تىگىلىپ، وندا كەلۋشىلەر قازاق حالقىنىڭ مادەنيەتىمەن، قولونەرىمەن جانە ۇلتتىق تاعامدارىمەن تانىسۋدا.
فەستيۆالدىڭ باستى تارتىسى — ۇزدىك قىمىز شەبەرىن انىقتايتىن بايقاۋ. باس جۇلدە ءۇشىن اقمولا، سولتۇستىك قازاقستان، اباي، ۇلىتاۋ وبلىستارىنان جانە قاراعاندى وبلىسىنىڭ بارلىق اۋدانىنان كەلگەن 37 قىمىز ءوندىرۋشى باق سىناۋدا.
بايقاۋ التى اتالىم بويىنشا وتكىزىلىپ جاتىر، ال جالپى جۇلدە قورى 10 ميلليون تەڭگەنى قۇرايدى. قاتىسۋشىلاردىڭ ونەرىن الەمگە ايگىلى ءانشى ديماش قۇدايبەرگەننىڭ اتا-انالارى كىرگەن بەدەلدى قازىلار القاسى باعالايدى.
فەستيۆالدىڭ اشىلۋ سالتاناتىندا قاراعاندى وبلىسىنىڭ اكىمى ەرماعانبەت بولەكپاەۆ قىمىزدىڭ بۇگىنگى كۇنى ۇلتتىق ءداستۇردىڭ اجىراماس بولىگى عانا ەمەس، گاسترونوميالىق ءتۋريزمدى دامىتۋدىڭ جانە قازاقستاندى حالىقارالىق دەڭگەيدە تانىتۋدىڭ ماڭىزدى قۇرالىنا اينالىپ كەلە جاتقانىن اتاپ ءوتتى.
— ۇلان-عايىر قازاق دالاسىن كارتادان عانا ەمەس، قىمىزدىڭ سان الۋان دامىنەن دە تانۋعا بولادى. ماسەلەن، قارقارالىنىڭ قىمىزىنا جۋسان مەن يزەننىڭ ءنارى سىڭگەن. قىمىز — جاي عانا سۋسىن ەمەس. ول — حالقىمىزدىڭ بىرەگەي مۇراسى، مادەنيەتىنىڭ، دۇنيەتانىمىنىڭ جانە تابيعاتپەن ۇيلەسىمدى ءومىر ءسۇرۋ سالتىنىڭ كورىنىسى. وسىنداي تاماشا فەستيۆالدىڭ ءدال قارقارالى جەرىندە ءوتۋى دە كەزدەيسوق ەمەس. قارقارالى — قازاق تاريحىنىڭ، ۇلتتىق رۋحتىڭ جانە ازاتتىق يدەيالارىنىڭ التىن بەسىگى. ۋاقىت وتە كەلە «BaiQymyz» قازاقتىڭ سالت-ءداستۇرىن الەمگە تانىتاتىن حالىقارالىق مادەني-تۋريستىك برەندكە اينالاتىنىنا سەنىمدىمىن، - دەدى ءوڭىر باسشىسى.
ۇيىمداستىرۋشىلار قوناقتار ءۇشىن مازمۇندى ءارى قىزىقتى باعدارلاما ازىرلەگەن. ۇلتتىق سپورت تۇرلەرىنەن بايگە، كوكپار، اۋدارىسپاق، جامبى اتۋ جانە تەڭگە ءىلۋ جارىستارىمەن قاتار، تازى جارىستارى، قازاقستاندىق جانە شەتەلدىك ونەرپازداردىڭ كونتسەرتتەرى، سونداي-اق ۇلتتىق تاعامدار ۇسىنىلاتىن كوپتەگەن گاسترونوميالىق الاڭدار ۇيىمداستىرىلعان.
فەستيۆالگە ارنايى كەلگەن تانىمال رەستوراتور ناريمان يرجانوۆ شەبەرلىك ساباعىن وتكىزىپ، كونە رەتسەپتىلەر بويىنشا ءداستۇرلى قازاق تاعامدارىن ازىرلەيدى.
فەستيۆال كەشكە دەيىن جالعاسادى. قوناقتاردى ءالى دە كوپتەگەن اسەرلى كورىنىستەر مەن توسىنسىيلار كۇتۋدە.
