Qarqaralylyqtar elımızdegı eŋ üzdık qymyz öndıruşılerdıŋ bırı ekenın taǧy bır märte däleldep otyr. Ötken jyly Astanada ötken alǧaşqy «BaiQymyz» festivalınde Tegısşıldık auylyndaǧy «Qarynşi» şarua qojalyǧy jüldegerler qatarynan körıngen bolatyn. Al biyl Ūly dalanyŋ qasiettı susynyna arnalǧan auqymdy merekenı Qarqaraly audanynyŋ özı qabyldauda.
Alǧaş ret ūiymdastyrylyp otyrǧan öŋıraralyq «BaiQymyz-2026» etno-gastrofestivalı Qaraǧandy oblysy äkımdıgınıŋ qoldauymen jäne demeuşıler — Eurasian Resources Group (ERG) men Integra Construction KZ holdingınıŋ qoldauymen ötude.
Auqymdy mereke Qazaqstannyŋ är öŋırınen, sondai-aq Resei men Qyrǧyzstannan kelgen myŋdaǧan qonaqtyŋ basyn qosty.
Qarqaraly maŋyndaǧy körkem tabiǧat aiasynda 27 aq şaŋqan kiız üi men şatyrdan qūralǧan etnoauyl tıgılıp, onda keluşıler qazaq halqynyŋ mädenietımen, qolönerımen jäne ūlttyq taǧamdarymen tanysuda.
Festivaldıŋ basty tartysy — üzdık qymyz şeberın anyqtaityn baiqau. Bas jülde üşın Aqmola, Soltüstık Qazaqstan, Abai, Ūlytau oblystarynan jäne Qaraǧandy oblysynyŋ barlyq audanynan kelgen 37 qymyz öndıruşı baq synauda.
Baiqau alty atalym boiynşa ötkızılıp jatyr, al jalpy jülde qory 10 million teŋgenı qūraidy. Qatysuşylardyŋ önerın älemge äigılı änşı Dimaş Qūdaibergennıŋ ata-analary kırgen bedeldı qazylar alqasy baǧalaidy.
Festivaldıŋ aşylu saltanatynda Qaraǧandy oblysynyŋ äkımı Ermaǧanbet Bölekpaev qymyzdyŋ bügıngı künı ūlttyq dästürdıŋ ajyramas bölıgı ǧana emes, gastronomiialyq turizmdı damytudyŋ jäne Qazaqstandy halyqaralyq deŋgeide tanytudyŋ maŋyzdy qūralyna ainalyp kele jatqanyn atap öttı.
— Ūlan-ǧaiyr qazaq dalasyn kartadan ǧana emes, qymyzdyŋ san aluan dämınen de tanuǧa bolady. Mäselen, Qarqaralynyŋ qymyzyna jusan men izennıŋ närı sıŋgen. Qymyz — jai ǧana susyn emes. Ol — halqymyzdyŋ bıregei mūrasy, mädenietınıŋ, dünietanymynyŋ jäne tabiǧatpen üilesımdı ömır süru saltynyŋ körınısı. Osyndai tamaşa festivaldıŋ däl Qarqaraly jerınde ötuı de kezdeisoq emes. Qarqaraly — qazaq tarihynyŋ, ūlttyq ruhtyŋ jäne azattyq ideialarynyŋ altyn besıgı. Uaqyt öte kele «BaiQymyz» qazaqtyŋ salt-dästürın älemge tanytatyn halyqaralyq mädeni-turistık brendke ainalatynyna senımdımın, - dedı öŋır basşysy.
Ūiymdastyruşylar qonaqtar üşın mazmūndy ärı qyzyqty baǧdarlama äzırlegen. Ūlttyq sport türlerınen bäige, kökpar, audaryspaq, jamby atu jäne teŋge ılu jarystarymen qatar, tazy jarystary, qazaqstandyq jäne şeteldık önerpazdardyŋ konsertterı, sondai-aq ūlttyq taǧamdar ūsynylatyn köptegen gastronomiialyq alaŋdar ūiymdastyrylǧan.
Festivalge arnaiy kelgen tanymal restorator Nariman İrjanov şeberlık sabaǧyn ötkızıp, köne reseptıler boiynşa dästürlı qazaq taǧamdaryn äzırleidı.
Festival keşke deiın jalǧasady. Qonaqtardy älı de köptegen äserlı körınıster men tosynsyilar kütude.
