استاناداعى جەكە كلينيكادا جوسپارلى وپەراتسياعا دايىندالىپ جاتقان زاپاستاعى پولكوۆنيك كوز جۇمدى، دەپ حابارلايدى "ادىرنا" ۇلتتىق پورتالى اق جايىققا سىلتەپ.
قايعىلى وقيعا تۋرالى مارقۇمنىڭ قىزى الەۋمەتتىك جەلىدە مالىمدەدى.
تۋىستارىنىڭ ايتۋىنشا، 51 جاستاعى ەر ادام مۇرىن قالقاسىن تۇزەتۋ جانە ۇيقى كەزىندەگى تىنىس الۋدىڭ توقتاپ قالۋىن ەمدەۋ ماقساتىندا سەپتوپلاستيكا مەن ۋۆۋلوپلاستيكا جاساتۋعا كەلگەن. الايدا وپەراتسيا باستالماي جاتىپ ونىڭ جاعدايى كۇرت ناشارلاعان.
مارقۇمنىڭ قىزىنىڭ سوزىنشە، ناۋقاسقا كوكتامىر ارقىلى مەديتسينالىق پرەپارات ەنگىزىلگەننەن كەيىن جۇرەگى كەنەتتەن توقتاپ قالعان. ودان كەيىن ول جەدەل تۇردە №2 قالالىق اۋرۋحاناعا اۋىر جاعدايدا جەتكىزىلگەن.
دارىگەرلەر التى كۇن بويى ەر ادامنىڭ ءومىرى ءۇشىن كۇرەسكەن. الدىن الا مالىمەت بويىنشا، ولىمگە مي ءىسىنۋى سەبەپ بولعان.
مارقۇمنىڭ جاقىندارى وقيعانىڭ جان-جاقتى ءارى وبەكتيۆتى تەرگەلۋىن تالاپ ەتىپ وتىر. ولار سوت-مەديتسينالىق ساراپتاما قورىتىندىسىن، سونداي-اق دەنساۋلىق ساقتاۋ مينيسترلىگى مەن مەديتسينالىق جانە فارماتسەۆتيكالىق باقىلاۋ كوميتەتىنىڭ رەسمي ۇستانىمىن كۇتۋدە.
«اكەم قاراپايىم جوسپارلى وپەراتسياعا بارعان ەدى، بىراق ۇيىنە ورالمادى. ەنگىزىلگەن پرەپاراتتىڭ قاۋىپسىزدىگى تەكسەرىلىپ، مەديتسينا قىزمەتكەرلەرىنىڭ ارەكەتىنە قۇقىقتىق باعا بەرىلۋىن تالاپ ەتەمىز»، – دەپ جازدى مارقۇمنىڭ قىزى.
