الماتىدا Audi ماركالى اۆتوكولىك جۇرگىزۋشىسى زەنكوۆ كوشەسىندە 5 جاياۋ جۇرگىنشىنى قاعىپ كەتتى. بۇل تۋرالى قالالىق پوليتسيا دەپارتامەنتى مالىمدەدى، دەپ حابارلايدى “ادىرنا”.
مالىمەتكە سايكەس، وڭتۇستىك باعىتتا كەلە جاتقان Audi جۇرگىزۋشىسى جولدىڭ ءجۇرۋ بولىگىندە تۇرعان بەس جاياۋ جۇرگىنشىنى سوعىپ وتكەن.
كۋاگەرلەردىڭ سوزىنشە، جولدا Audi 80 اۆتوكولىگى ءبىر ساتتە ءوشىپ قالعان. جانىنداعىلار جۇرگىزۋشىگە كومەكتەسىپ، كولىكتى يتەرگەننەن كەيىن ول قايتا وت العان. الايدا جۇرگىزۋشى كولىكتى باسقارا الماي العا ۇمتىلىپ، جول جيەگىندە تۇرعان ادامداردى قاققان. ودان كەيىن كولىك جول جيەگىندە تۇرعان Toyota Granvia شاعىن اۆتوبۋسىمەن سوعىسقان. سوققىنىڭ اسەرىنەن Toyota جانىندا تۇرعان Subaru Impreza كولىگىنە سوعىلعان.
وقيعادان زارداپ شەككەن 5 ادامعا العاشقى مەديتسينالىق كومەك كورسەتىلدى.
قازىرگى ۋاقىتتا وقيعانىڭ بارلىق ءمان-جايىن مەدەۋ اۋداندىق پوليتسيا باسقارماسىنىڭ قىزمەتكەرلەرى انىقتاپ جاتىر.
ەسكە سالساق، بۇعان دەيىن تۇركىستان وبلىسىنىڭ ارىس قالاسىندا ماس كۇيىندە كولىك جۇرگىزگەن 52 جاستاعى ايەل جەكە ءۇيدىڭ الدىندا ورنالاسقان ورىندىقتا وتىرعان ادامدار توبىن قاعىپ كەتكەن بولاتىن. سالدارىنان وقيعا ورنىندا ءتورت ادام، ونىڭ ىشىندە ەكى بالا مەن جۇكتى ايەل كوز جۇمدى.
سونداي-اق كوكشەتاۋدا دا تۇرعىن ءۇي اۋلاسىندا ادام ولىمىنە اكەلگەن جول-كولىك وقيعاسى تىركەلگەن ەدى. اۆتوكولىك تۇراققا كىرەبەرىستە الدىمەن بورديۋرگە سوعىلىپ، كەيىن ايەلدى قاعىپ كەتىپ، ۇستىنەن باسىپ وتكەن. زارداپ شەككەن ايەل وقيعا ورنىندا قازا تاپتى.
ال وسى قايعىلى وقيعادان بىرنەشە كۇن وتكەن سوڭ كوكشەتاۋدا تاعى ءبىر كولىك جۇرگىزۋشىسى اۆتوتۇراققا كولىگىن قويماق بولعان كەزدە كىشكەنتاي بالانى قاعىپ كەتكەن. باقىتىنا قاراي، بۇل جولى بالا امان قالىپ، مەديتسينالىق كومەك كورسەتىلگەن.
