“ادىرنا” ۇلتتىق پورتالى YouTube ارناسىنىڭ كەزەكتى قوناعى – قازاق ءتىلىنىڭ جاناشىرى، قوعام بەلسەندىسى ۆاۆيلين ۆياچەسلاۆ دميتريۇلى. سۇحبات بارىسىندا ول قازاق ءتىلىن قالاي مەڭگەرگەنى، قانداستار ماسەلەسىنە نە سەبەپتى ەرەكشە كوڭىل بولەتىنى جانە ەلدەگى كوشى-قون ساياساتىنىڭ وزەكتى تۇيتكىلدەرى تۋرالى وي ءبولىستى.
باعدارلامادا قانداستاردىڭ قازاقستانعا بەيىمدەلۋى، ولاردىڭ ءبىلىم الۋ مەن قۇجات راسىمدەۋ كەزىندەگى قيىندىقتارى، اسىرەسە قازاق مەكتەبىندە وقىماعان قانداستار ءۇشىن تەست تاپسىرۋ ماسەلەسى ءسوز بولادى. سونداي-اق قوناق ەل پرەزيدەنتتەرى الدىندا سويلەگەن سوزدەرى، وزىنە ەرەكشە اسەر ەتكەن وقيعالار جانە قازاق ءتىلىنىڭ بۇگىنگى جاعدايى تۋرالى پىكىرىن ورتاعا سالادى.
سۇحبات بارىسىندا قازاق تىلىندە كىتاپ وقۋ مادەنيەتى، قازاقشا بىلمەيتىن قازاقتارعا قاتىستى كوزقاراسى، ۇلتتىق قۇندىلىقتاردى دارىپتەۋ جولىنداعى باستامالارى مەن قازاق ءتىلىن كۇندەلىكتى ومىردە قولدانۋدىڭ ماڭىزى تالقىلانادى. بۇدان بولەك، قانداستاردىڭ ەل دامۋىنا قوسىپ جاتقان ۇلەسى، قازاقستاننىڭ بولاشاعىنا قاتىستى پايىمى جانە قازاق تىلىنە دەگەن ەرەكشە ىقىلاسى ءسوز بولادى.
باعدارلامانىڭ سوڭىندا ۆياچەسلاۆ دميتريۇلى ءوزىنىڭ شىعارماشىلىعى تۋرالى ايتىپ، ورىس ۇلتىنىڭ وكىلى بولا تۇرا قازاق تىلىندە ولەڭ جازۋىنىڭ سىرىمەن بولىسەدى.
