بەلگىلى شاحماتشى ءبيبىسارا اساۋباەۆا پرەزيدەنت قاسىم-جومارت توقاەۆقا ۆيدەوۇندەۋ جاريالادى، دەپ حابارلايدى «ادىرنا» ءتىلشىسى.
ول ءوز ۇندەۋىندە حالىقارالىق دارەجەدەگى گروسسمەيستەر ەكەنىن جانە ايەل شاحماتشىلاردىڭ الەمدىك رەيتينگىندە بەسىنشى ورىندا تۇرعانىن ەسكە سالدى.
«بۇگىن ەڭ بەدەلدى جارىستاردىڭ ءبىرى – Norway Chess ءتۋرنيرى اياقتالدى. مەن جارىس مارەسىنە ءبىر تۋر قالعاندا جەڭىمپاز اتاندىم. وسى ماڭىزدى دوداعا دايىندىق مەنىڭ جانە اتا-انامنىڭ قاراجاتى ەسەبىنەن ءوتتى. ازىرگە سەكۋنداندار مەن اناليتيكتەردىڭ ەڭبەگىنە اقى تولەي العان جوقپىز. ءسىزدىڭ سوزىڭىزبەن ايتقاندا، مەن ەلىمىزدىڭ التىن قورىنا جاتامىن. مەدالدارىم ەڭبەكپەن، دەنساۋلىقپەن جانە توزىممەن كەلەدى. بارلىق قيىندىققا قاراماستان، سپورتشى رەتىندە جوعارى ناتيجەلەرگە قول جەتكىزىپ، ەلىمىزدىڭ تۋى مەن ابىرويىن اسقاقتاتىپ كەلەمىن»، – دەپ جازدى شاحماتشى الەۋمەتتىك جەلىدەگى پاراقشاسىندا.
اساۋباەۆا جىل سايىن ءتۇرلى قيىندىقتارعا تاپ بولاتىنىن ايتتى.
«سپورت مينيسترلىگىمەن جۇمىس ىستەۋ جىلدان-جىلعا قيىنداپ بارادى. شاحماتتان الەم چەمپيوناتىن جەڭگەنىم ءۇشىن مينيسترلىك بەرەتىن سىياقى – نەبارى 2 مىڭ دوللار. ال وليمپيادا جۇلدەگەرلەرىنە 250 مىڭ دوللار تولەنەدى. قازاقستاندا ەرەسەكتەر اراسىندا الەم چەمپيونى اتانعان شاحماتشىلار جوق. مەن ەكى دۇركىن الەم چەمپيونى اتانعاننان كەيىن، 2023 جىلدان باستاپ سپورت مينيسترلىگى ارقىلى اي سايىن 1 ميلليون تەڭگە كولەمىندە جالاقى الىپ كەلدىم. الايدا 2025 جىلى تۋريزم جانە سپورت ءمينيسترى ەربول مىرزابوسىنوۆ قىزمەتكە كەلگەن سوڭ جالاقىم ءۇش ەسەگە قىسقاردى. قازاقستان شاحمات فەدەراتسياسىنان ەشقاشان جالاقى العان ەمەسپىن. 2026 جىلدىڭ قارساڭىندا بليتستەن ءۇشىنشى رەت الەم چەمپيونى اتاندىم. بۇل ماعان الەمدىك شاحمات تاجىنە ۇمىتكەرلەر تۋرنيرىنە قاتىسۋ قۇقىعىن بەردى. سوعان قاراماستان مينيسترلىك تاراپىنان جالاقىم وسكەن جوق»، – دەدى گروسسمەيستەر.
شاحماتشىنىڭ ايتۋىنشا، 2026 جىلدىڭ قارساڭىندا بليتستەن الەم چەمپيوناتىندا جەڭىپ العان التىن مەدالى وعان الەم چەمپيونى اتاعىنا ۇمىتكەرلەر تۋرنيرىنە قاتىسۋعا جولداما بەرگەن. قاڭتار ايىندا ول سپورت مينيسترىمەن جەكە كەزدەسىپ، مينيستر «Sport Qory» قورى ارقىلى تولىق قولداۋ كورسەتىلەتىنىنە ۋادە بەرگەن. الايدا قور قاجەتتى قارجىنىڭ تەك ءبىر بولىگىن عانا بولگەن.
قارجى تاپشىلىعىنا بايلانىستى اساۋباەۆانىڭ سەكۋنداندارى قاشىقتان جۇمىس ىستەۋگە ءماجبۇر بولعان. سالدارىنان ءبيبىسارا تۋرنيرگە جەكە قولداۋ توبىنسىز كەلگەن جالعىز قاتىسۋشى اتانعان. سوعان قاراماستان ول جارىستا ەكىنشى ورىن يەلەنگەن. كەيىن قوردىڭ قامقورشىلىق كەڭەسى ماقۇلداعان ەكىنشى ءوتىنىم دە قور باسشىلىعى تاراپىنان سەبەپسىز كەرى قايتارىلعان.
ءبيبىسارا اساۋباەۆا پرەزيدەنتتىڭ 2025 جىلدىڭ 30 جەلتوقسانىنداعى جارلىعىمەن وزىنە II دارەجەلى «بارىس» وردەنى بەرىلگەنىن دە ەسكە سالدى.
«سپورت مينيسترلىگىنىڭ شاقىرۋىمەن وردەندى الۋ ءۇشىن استاناعا ءۇش رەت ۇشىپ باردىم. بىراق ءار جولى ساپارىم كەيىنگە شەگەرىلدى. وكىنىشكە قاراي، بۇگىنگە دەيىن وردەندى العان جوقپىن. ءسىزدىڭ اتىڭىزعا eOtinish ارقىلى ءساۋىر جانە مامىر ايلارىندا ءۇش حات جولدادىق، بىراق ءالى جاۋاپ جوق. سول حاتتاردى مينيسترگە WhatsApp ارقىلى دا جىبەردىك. جاۋاپ ورنىنا ۇنسىزدىك بولدى. الدىمىزدا ماڭىزدى جارىستار، وقۋ-جاتتىعۋ جيىندارى جانە ۇلكەن جۇمىس كۇتىپ تۇر. قۇرمەتتى پرەزيدەنت، ماعان نە ىستەۋ كەرەك؟» – دەپ سۇرادى شاحماتشى.
ايتا كەتەيىك، Norway Chess Women 2026 سۋپەرتۋرنيرى 25 مامىر مەن 5 ماۋسىم ارالىعىندا وسلو قالاسىندا ءوتتى. ءبيبىسارا اساۋباەۆا مۇمكىن بولاتىن 30 ۇپايدىڭ 16,5-ىن جيناپ، وسى تۋرنيردە جەڭىسكە جەتكەن العاشقى قازاقستاندىق شاحماتشى اتاندى. كلاسسيكالىق باعدارلامادا ول ءۇش پارتيادا جەڭىسكە جەتىپ، بىرەۋىندە جەڭىلىس تاپتى جانە التى ويىندى تەڭ ناتيجەمەن اياقتادى.
بۇعان دەيىن وليمپيادا چەمپيونى ميحايل شايدوروۆ تا بىرنەشە اي بويى جالاقى الماعانىن ايتقان ەدى.
