فوتو: OVO by Cirque du Soleil ءباسپاسوز قىزمەتى
11 ماۋسىم كۇنى الماتىداعى Almaty Arena كەشەنىندە الەمگە ايگىلى Cirque du Soleil كومپانياسىنىڭ «OVO» اتتى قويىلىمىنىڭ پرەمەراسى ءوتتى. بۇل شوۋ الەمنىڭ 47-دەن استام ەلىن ارالاپ، 17 جىلدان بەرى ساحنالانىپ كەلە جاتقان ەڭ تانىمال جوبالاردىڭ ءبىرى.
الماتى – قازاقستانداعى بۇل قويىلىم كورسەتىلگەن ەكىنشى قالا. بۇعان دەيىن شوۋ استانادا وتكەن. جالپى «OVO» گاسترولدىك تۋرى بارىسىندا 10 ميلليوننان استام كورەرمەن تاماشالاعان.
شوۋدىڭ ءمانى مەن يدەياسى
«OVO» ءسوزى پورتۋگال تىلىنەن اۋدارعاندا «جۇمىرتقا» دەگەن ماعىنانى بىلدىرەدى. قويىلىمنىڭ نەگىزگى سيۋجەتى جاندىكتەر الەمىنە تۇسكەن جۇمباق جۇمىرتقا توڭىرەگىندە ءوربيدى.
ساحنادا ورمەكشى، كوبەلەك، قۇمىرسقا، قوڭىز جانە باسقا دا جاندىكتەر بەينەلەنەدى. شوۋ تەك ۆيزۋالدى اسەر ەمەس، تەرەڭ سيمۆوليكالىق ماعىناعا يە الەم رەتىندە ۇسىنىلادى.
بۇل قويىلىم ساحنادا 17 جىلدان بەرى كورسەتىلىپ كەلەدى. وسى ۋاقىت ىشىندە ونى الەمنىڭ 50-گە جۋىق ەلىندە 10 ميلليوننان استام كورەرمەن تاماشالاعان. قازاقستان – OVO گاسترولدىك ساپارى جەتكەن 47-ءشى مەملەكەت.
جوبادا الەمنىڭ 25 ەلىنەن كەلگەن 100-دەن استام مامان جۇمىس ىستەيدى. شوۋدا 53 كاسىبي ءارتىس (اكروباتتار، گيمناستتار، حالىقارالىق جارىستاردىڭ چەمپيوندارى) ونەر كورسەتەدى. قويىلىمدى 7 مۋزىكانت پەن 1 ۆوكاليست جاندى داۋىسپەن سۇيەمەلدەيدى.
ءبىر قويىلىم ءۇشىن شامامەن 800 كوستيۋم ەلەمەنتى پايدالانىلادى. ولاردىڭ بارلىعى مونرەالداعى (كانادا) شتاب-پاتەردە ءار ارتىسكە جەكە تىگىلگەن.
ساحنا ارتىنداعى دايىندىق
پرەمەرا الدىندا جۋرناليستەرگە backstage ايماعىنا كىرۋگە مۇمكىندىك بەرىلدى. ول جەردە ارتىستەر كۇردەلى اكروباتيكالىق ەلەمەنتتەردى پىسىقتاپ، كوستيۋمدەر مۇقيات تەكسەرىلىپ، تەحنيكالىق كوماندا جارىق پەن دىبىس جۇيەسىن باپتاپ جاتتى.
بۇل – كورەرمەن كورمەيتىن، بىراق شوۋدىڭ ساپاسىن انىقتايتىن ەڭ ماڭىزدى كەزەڭدەردىڭ ءبىرى.
الەمدىك دەڭگەيدەگى ارتىستەر
Cirque du Soleil ارتىستەرى ۇزاق جىلدار بويى ارنايى دايىندىقتان وتكەن كاسىبي اكروباتتار.
برازيليالىق ءارتىس ۆەللينگتون ليما 28 جىل بويى كومپانيادا جۇمىس ىستەپ، بىرنەشە شوۋعا قاتىسقان.
«مەن قورقىنىش تۋرالى ويلامايمىن. كۇندەلىكتى جاتتىعۋ مەن تاجىريبە سەنىمدىلىك بەرەدى. ەگەر ءومىرىڭدى وسى ىسكە ارناساڭ، قورقىنىش وزدىگىنەن جوعالادى»، - دەيدى ول.
ال بەلگيالىق اكروبات يورن دە لەندار ءۇشىن بۇل جۇمىس – بالا كۇنگى ارماننىڭ ورىندالۋى.
ء«ار كەش سايىن زالدىڭ ەنەرگياسىن سەزىنۋ – مەن ءۇشىن ەڭ ۇلكەن باقىت", دەدى لەندار.
يۋمور جانە ەموتسيا ءتىلى
شوۋدىڭ ەرەكشەلىگى – ءتىلسىز يۋمور. بارلىق كورىنىستەر تەك قيمىل، ميميكا جانە پلاستيكا ارقىلى بەرىلەدى. سول سەبەپتى شوۋ بارلىق جاستاعى جانە ءتۇرلى تىلدەگى كورەرمەنگە بىردەي تۇسىنىكتى.
كەشكە كەلگەن كورەرمەندەر شوۋعا جوعارى باعا بەردى.
«العاشىندا TikTok پىكىرلەرىنە قاراپ كۇمانداندىم. بىراق شوۋ باستالعان ساتتە-اق ءبارى وزگەردى. بۇل ينتەرنەت ايتقانداي ەمەس، ودان الدەقايدا اسەرلى ەكەن» - كورەرمەن پىكىرىنەن.
كۇردەلى اكروباتيكالىق نومىرلەر
قويىلىم بارىسىندا اۋە اكروباتيكاسى، باتۋت ەلەمەنتتەرى، قابىرعا بويىمەن سەكىرۋ جانە توپتىق سينحروندىق نومىرلەر كورسەتىلدى.
كەي ساتتەردە زالدا تولىق تىنىشتىق ورناپ، كورەرمەن ءار قوزعالىستى دەمىن ىشىنە تارتىپ باقىلاپ وتىردى.
كورەرمەندەر ەڭ كوپ اسەر العان نومىرلەردىڭ ءبىرى – اۋە دۋەتى. ول تەك اكروباتيكا ەمەس، سەنىم مەن ۇيلەسىمگە قۇرىلعان كوركەم بي رەتىندە قابىلداندى.
سونداي-اق «ورمەكشى قىز» بەينەسىندەگى ءارتىستىڭ پلاستيكاسى ەرەكشە اسەر قالدىردى. ونىڭ قوزعالىسى ادام دەنەسىنىڭ مۇمكىندىكتەرىن قايتا ويلاۋعا ءماجبۇر ەتتى.
كورەرمەندەر مەن جۋرناليستەر ۇيىمداستىرۋ جۇمىستارىنا دا جوعارى باعا بەردى.
Cirque du Soleil-ءدىڭ «OVO» شوۋى الماتى كورەرمەنىنە الەمدىك دەڭگەيدەگى تسيرك ونەرىنىڭ جاڭا ستاندارتىن كورسەتتى. كۇردەلى اكروباتيكا، ۆيزۋالدى ەستەتيكا جانە ەموتسيالىق اسەر ءبىر ساحنادا توعىستى.
بۇل تەك شوۋ ەمەس — ادام مۇمكىندىگىنىڭ شەكسىزدىگىن كورسەتەتىن ونەر تۋىندىسى.
