برازيليانىڭ بۇرىنعى پرەزيدەنتى جاير بولسونارۋدىڭ ۇلى ەدۋاردۋ بولسونارۋ اقش-تى برازيلياعا قارسى سانكتسيالار ەنگىزۋگە شاقىرعانى ءۇشىن 4 جىل 2 ايعا باس بوستاندىعىنان ايىرىلدى، دەپ حابارلايدى «ادىرنا» ءتىلشىسى.
جوعارعى سوت ەلدىڭ ەكس-پرەزيدەنتى جاير بولسونارۋدىڭ ۇلى ەدۋاردۋ بولسونارۋعا قاتىستى ۇكىم شىعارعان. وعان اكەسىنە قاتىستى مەملەكەتتىك توڭكەرىس ءىسى قارالىپ جاتقان كەزەڭدە اقش-تى برازيلياعا قارسى سانكتسيالار ەنگىزۋگە شاقىردى دەگەن ايىپ تاعىلعان.
سوت ەدۋاردۋ بولسونارۋدى 4 جىل 2 اي مەرزىمگە باس بوستاندىعىنان ايىرۋ تۋرالى شەشىم قابىلداعان.
سۋديا الەشاندري دي مورايەستىڭ ايتۋىنشا، بولسونارۋ سوت بيلىگى مەن مەملەكەتتىك ورگانداردىڭ وكىلدەرىنە قىسىم كورسەتۋگە تىرىسقان، سونداي-اق شەتەلدە ءوز ەلىنىڭ مۇددەسىنە قايشى كەلەتىن باستامالاردى قولداعان.
سوت شەشىمى بويىنشا بۇرىنعى پرەزيدەنتتىڭ ۇلىنا سەگىز جىل بويى مەملەكەتتىك قىزمەت اتقارۋعا تىيىم سالىندى. ول 2015–2025 جىلدارى برازيليا پارلامەنتىنىڭ تومەنگى پالاتاسىنىڭ دەپۋتاتى بولعان.
ۇكىم سىرتتاي شىعارىلدى. قازىرگى ۋاقىتتا ەدۋاردۋ بولسونارۋ اقش-تا تۇرادى. ەگەر ول برازيلياعا ورالسا، قاماۋعا الىنۋى مۇمكىن.
ەسكە سالساق، 2022 جىلعى قازاندا برازيلياداعى پرەزيدەنت سايلاۋىنىڭ ناتيجەلەرى جاريالانعاننان كەيىن ەلدە جاپپاي نارازىلىق شەرۋلەرى وتكەن ەدى. نارازىلىقتار سايلاۋدا جەڭىسكە جەتكەن لۋيس يناسيۋ لۋلا دا سيلۆانىڭ قىزمەتىنە كىرىسۋ ءراسىمىنىڭ الدىندا باستالعان.
2023 جىلعى قاڭتاردا جاير بولسونارۋدىڭ سايلاۋ ناتيجەلەرىمەن كەلىسپەگەن جاقتاستارى برازيليا استاناسىنداعى پارلامەنت عيماراتىن باسىپ العان. ولار پرەزيدەنت رەزيدەنتسياسى سانالاتىن پلانالتۋ سارايى مەن جوعارعى سوت عيماراتىنىڭ اۋماعىنا دا كىرگەن.
كەيىن جاير بولسونارۋ ءوز جاقتاستارى ۇيىمداستىرعان تارتىپسىزدىكتەرگە قاتىستى مالىمدەمە جاساپ، بولعان وقيعانى ايىپتادى.
2023 جىلعى شىلدەدە بولسونارۋ سايلاۋ قارساڭىندا بيلىگىن اسىرا پايدالاندى جانە سايلاۋ ناتيجەلەرى بۇرمالانۋى مۇمكىن دەگەن جالعان مالىمدەمەلەر جاسادى دەپ تانىلدى. سونىڭ ناتيجەسىندە سوت وعان سەگىز جىل بويى پرەزيدەنتتىك سايلاۋعا قاتىسۋعا تىيىم سالدى.
ال بيىل اقپاندا باس پروكۋراتۋرا وعان مەملەكەتتىك توڭكەرىس جاساۋعا ارەكەتتەندى دەگەن ايىپتى قايتا تاقتى. كۇزدە جاير بولسونارۋ اسكەري توڭكەرىس ۇيىمداستىرۋعا دايىندالدى دەگەن ايىپپەن 27 جىلعا باس بوستاندىعىنان ايىرىلدى.
