رەسەي پرەزيدەنتى ۆلاديمير پۋتين 9-شاقىرىلىمداعى مەملەكەتتىك دۋما سايلاۋىن 20 قىركۇيەككە بەلگىلەۋ تۋرالى جارلىققا قول قويدى. ءتيىستى قۇجات 16 ماۋسىم كۇنى قۇقىقتىق اقپاراتتىڭ رەسمي ينتەرنەت-پورتالىندا جاريالاندى، دەپ حابارلايدى «ادىرنا» ءتىلشىسى.
داۋىس بەرۋ بۇرىنعىداي ءۇش كۇنگە سوزىلادى. 20 قىركۇيەك ءداستۇرلى ۋچاسكەلەردە داۋىس بەرۋدىڭ سوڭعى كۇنى بولادى. سايلاۋ رەسەيدەگى وڭىرلىك جانە مۋنيتسيپالدىق سايلاۋلارمەن بىرگە بىرىڭعاي داۋىس بەرۋ كۇنى اياسىندا وتەدى.
ورتالىق سايلاۋ كوميسسياسىنىڭ ءتورايىمى ەللا پامفيلوۆانىڭ ايتۋىنشا، سايلاۋ ناۋقانى 16 ماۋسىمنان باستالعان. بۇعان دەيىن ول داۋىس بەرۋ كەزەڭىندە بىرقاتار وڭىردە بايلانىس پەن ينتەرنەت جۇمىسىنا ۋاقىتشا شەكتەۋلەر ەنگىزىلۋى مۇمكىن ەكەنىن ايتىپ، ازاماتتاردى تۇسىنىستىكپەن قاراۋعا شاقىرعان.
«بايلانىس پەن ينتەرنەتكە قاتىستى شەكتەۋلەر قاۋىپسىزدىكتى قامتاماسىز ەتۋ ماقساتىندا ەنگىزىلەدى»، – دەدى ول.
ورتالىق سايلاۋ كوميسسياسى توراعاسىنىڭ ورىنباسارى نيكولاي بۋلاەۆ كوميسسيا ەل وڭىرلەرىندەگى ۇشقىشسىز ۇشۋ اپپاراتتارىنا بايلانىستى احۋالدى ەسكەرە وتىرىپ، ارنايى قاۋلى جوباسىن دايىنداعانىن مالىمدەدى.
بۇل – رەسەيدىڭ ۋكرايناعا قارسى كەڭ اۋقىمدى سوعىسى باستالعاننان كەيىن وتەتىن العاشقى مەملەكەتتىك دۋما سايلاۋى. داۋىس بەرۋ العاش رەت رەسەي بيلىگى ءوز قۇرامىنا قوستى دەپ جاريالاعان ۋكراينانىڭ دونەتسك، زاپوروجە، حەرسون جانە لۋگانسك وبلىستارىنىڭ باسىپ الىنعان اۋماقتارىندا ۇيىمداستىرىلادى. اننەكسيالانعان قىرىمدا مۇنداي سايلاۋلار بۇعان دەيىن دە وتكەن.
ەلدىڭ 33 وڭىرىندە قاشىقتان ەلەكتروندى داۋىس بەرۋ وتكىزىلەدى. دەسە دە، بۇل جۇيە بىرنەشە رەت سىنعا ۇشىراپ، جۋرناليستەر مەن ساراپشىلار ونلاين داۋىس بەرۋ بارىسىندا جاپپاي بۇرمالاۋشىلىقتار بولعانىن مالىمدەگەن ەدى.
سايلاۋ پارتيالىق تىزىمدەر جانە 225 ءبىرمانداتتى وكرۋگ بويىنشا وتەدى. سايلاۋعا 17 پارتيا قاتىسپاق. ولاردىڭ 12-ءسى وڭىرلىك پارلامەنتتەردە وكىلدىگى بولعاندىقتان قول جيناۋدان بوساتىلعان.
وپپوزيتسيالىق كانديداتتار ءۇشىن سايلاۋ ناۋقانى كۇردەلى جاعدايدا وتپەك. زاڭنامانىڭ كەزەكتى قاتاڭداتىلۋىنان كەيىن رەسەي بيلىگى وزىنە ۇنامايتىن كانديداتتاردى سايلاۋدان شەتتەتۋ مۇمكىندىگىن كەڭەيتكەن. سونىڭ سالدارىنان «يابلوكو» جانە كوممۋنيستىك پارتيانىڭ بىرقاتار تانىمال وكىلى اكىمشىلىك جازالار مەن قىلمىستىق ىستەرگە بايلانىستى سايلاۋعا قاتىسۋ قۇقىعىنان ايىرىلعان.
«يابلوكو» پارتياسى ۋكرايناداعى سوعىسقا قارسى ۇستانىم بىلدىرەتىن جانە سايلاۋعا قاتىسۋعا رۇقسات العان جالعىز ساياسي كۇش بولىپ قالىپ وتىر. پارتيا ەكى تاراپتى دا بەيبىت كەلىسسوزدەرگە شاقىرادى. ال سوعىسقا قارسى جانە وپپوزيتسيالىق ۇيىمداردىڭ باسىم كوپشىلىگى سايلاۋعا جىبەرىلمەگەن.
الدىڭعى مەملەكەتتىك دۋما سايلاۋى 2021 جىلدىڭ 17–19 قىركۇيەك ارالىعىندا وتكەن ەدى.
