جۋرناليست روزا ەسەنقۇلوۆا بۇرىنعى جۇبايى، «قازتاگ» اقپارات اگەنتتىگىنىڭ باس رەداكتورى ءامىر قاسەنوۆكە قاتىستى تۇرمىستىق زورلىق-زومبىلىق، اجىراسۋ سەبەپتەرى جانە ونىڭ تابىسىنىڭ اشىق ەمەستىگى تۋرالى پىكىر ءبىلدىردى. بۇل تۋرالى ول Facebook پاراقشاسىندا جازدى، دەپ حابارلايدى "ادىرنا".
ەسەنقۇلوۆانىڭ ايتۋىنشا، جازباعا سەبەپ بولعان جاعداي - ءامىر قاسەنوۆتىڭ الەۋمەتتىك جەلىلەردەگى بۇرىنعى جۇبايى وعان «اۋىر مەنتالدىق جاراقات كەلتىردى» دەگەن مالىمدەمەلەرى. وسىعان بايلانىستى جۋرناليست 2008 جىلى بولعان وقيعالارعا قاتىستى ءوز نۇسقاسىن جاريالاعان.
ەسەنقۇلوۆانىڭ سوزىنشە، وتباسىنداعى جانجال ۇيلەنگەن العاشقى تۇننەن باستالعان. ول كۇيەۋىنىڭ اگرەسسيۆتى مىنەز تانىتىپ، «ناعىز كەلىن» مىندەتتەرىن ورىنداۋدى تالاپ ەتكەنىن ايتادى.
«تويدان كەيىن مەن كۇيەۋىمنىڭ تۋىستارىنا شايدى ونىڭ ويىنشا “دۇرىس” بەرمەگەنىم ءۇشىن (ياعني تاڭعى 6-داعى كەلىن شايى), ماعان بەلدىكپەن فيزيكالىق كۇش قولدانىلدى»، - دەپ جازعان ەسەنقۇلوۆا.
ونىڭ ايتۋىنشا، سول ءتۇنى ول كۇيەۋىن ۇيدەن شىعارىپ جىبەرىپ، بىرگە تۇرۋدى توقتاتقان. كەيىن قۇقىق قورعاۋ ورگاندارىنا جۇگىنىپ، ءامىر قاسەنوۆكە وعان جاقىنداۋعا تىيىم سالاتىن قورعاۋ نۇسقاماسى بەرىلگەن.
ەسەنقۇلوۆا ۇلىن ءوزى تاربيەلەپ وتىرعانىن جانە بالاسىنىڭ جاقىندا مەكتەپتى اياقتاعانىن اتاپ وتەدى. ونىڭ سوزىنشە، بۇرىنعى جۇبايى سوت كەزىندە جۇمىسسىز ەكەنىن ايتىپ، اكەلىك مىندەتتەردى ورىنداۋدان باس تارتقان.
ءجۋرناليستتىڭ مالىمەتىنشە، ءامىر قاسەنوۆ جۇمىس ىستەيتىن ۇيىم تاراپىنان تۇسەتىن اليمەنت مولشەرى ايىنا 14 مىڭ تەڭگەنى قۇرايدى. ول بۇل سومانىڭ بالانىڭ كۇندەلىكتى شىعىندارىن دا جاپپايتىنىن ايتادى.
“قازتاگ” جىبەرەتىن سول 14 مىڭ تەڭگە اليمەنت بالانىڭ ءبىر كۇندىك شىعىنىن دا جاپپايدى. ال وسىنداي ميزەرلى جالاقىمەن ۇلكەن پورتالدىڭ باس رەداكتورى قالايشا ءۇش بالالى وتباسىن اسىراپ وتىر؟» - دەپ جازعان ول.
ەسەنقۇلوۆا سوت ورىنداۋشىسىنىڭ ناقتى تابىستى انىقتاۋ جانە قارىزدى ءوندىرىپ الۋ ماسەلەسىندە قيىندىقتارعا تاپ بولىپ وتىرعانىن دا العا تارتقان.
سونىمەن قاتار ول «قازتاگ» باسشىلىعى مەن بۋحگالتەرياسىنىڭ رەسمي سۇراۋلارعا جاۋاپ بەرمەۋى جونىندە سۇراقتار كوتەرگەن.
جازبانىڭ سوڭىندا ول وتباسىلىق جاعداي مەن كاسىبي قىزمەت اراسىنداعى جاۋاپكەرشىلىككە نازار اۋدارىپ، اۋديتوريا الدىنداعى سەنىم ماسەلەسىن قوزعايدى.
بۇل ءىس بويىنشا بۇعان دەيىن دە الەۋمەتتىك جەلىلەردە تالقىلاۋلار بولعان. ەسەنقۇلوۆا اليمەنت مولشەرى مەن تابىس تۋرالى كۇمان كەلتىرىپ، رەسمي جالاقىنىڭ تومەن كورسەتىلۋى مۇمكىن ەكەنىن ايتقان.
ايتا كەتەيىك، ءامىر قاسەنوۆ پەن اسەت ماتاەۆ «فريدوم فينانس» ىسىنە قاتىستى قوزعالعان قىلمىستىق ءىس بويىنشا سوتتالۋشىلار قاتارىندا. سوڭعى مالىمەتتەرگە سايكەس، سوت قاسەنوۆتىڭ بۇلتارتپاۋ شاراسىن بۇزۋىنا بايلانىستى ونى ۇيقاماقتان قاماۋعا الۋ شاراسىنا اۋىستىرعان.
2025 جىلى «قازتاگ» «فريدوم فينانس» جانە ونىڭ نەگىزىن قالاۋشى تيمۋر تۋرلوۆقا قاتىستى 250-دەن استام ماتەريال جاريالاعان. كەيىن سوت كەيبىر ماتەريالداردى جالعان دەپ تانىپ، ولاردى تەرىسكە شىعارۋدى مىندەتتەگەن.
2025 جىلدىڭ جەلتوقسانىندا «قازتاگ» باس ديرەكتورى اسەت ماتاەۆ پەن باس رەداكتور ءامىر قاسەنوۆكە قاتىستى جالعان اقپارات تاراتۋ ءىسى بويىنشا كۇدىكتى مارتەبەسى بەرىلگەنى حابارلانعان.
