بۇگىن وبلىس اكىمى مۇرات ەرگەشباەۆتىڭ قاتىسۋىمەن «اكە تاربيەسى – ۇلتتىڭ رۋحاني دىڭگەگى» اتتى وبلىستىق اكەلەر فورۋمى ءوتتى. وعان «اكەلەر وداعى» رەسپۋبليكالىق قوعامدىق بىرلەستىگى توراعاسىنىڭ ورىنباسارى بەكدايىر كۇزەمباي، ءماسليحات دەپۋتاتتارى، زيالى قاۋىم وكىلدەرى، اۋدانداردان كەلگەن، ءتۇرلى سالادا تابىسقا جەتىپ، كاسىبى مەن ەڭبەگى ارقىلى ەلگە ۇلگى بولىپ جۇرگەن ازاماتتار قاتىستى.
بيىل اكەلەر فورۋمى ءتورتىنشى مارتە ۇيىمداستىرىلۋدا. بۇل – ۇلتتىق قۇندىلىقتاردى دارىپتەپ، ەر ازاماتتىڭ وتباسى مەن قوعامداعى مارتەبەسىن ارتتىرۋعا باعىتتالعان ماڭىزدى الاڭ.
«پرەزيدەنتىمىز قاسىم-جومارت كەمەلۇلى: «اكە جاۋاپكەرشىلىگى – وتباسىنىڭ بەرىكتىگى مەن ۇرپاق تاربيەسىنىڭ نەگىزى. ءبىزدىڭ قوعامدا اكەنىڭ ءرولىن ارتتىرۋ، ونىڭ وتباسىنداعى بەدەلىن نىعايتۋ – وتە ماڭىزدى مىندەت» دەگەن بولاتىن.
ۇلتتىڭ ساپاسى، بولاشاق ۇرپاقتىڭ ازاماتتىق بولمىسى اكەنىڭ بەرگەن تاربيەسىنە تىكەلەي بايلانىستى. جاڭا كونستيتۋتسيامىزدا «نەكە مەن وتباسى، انا مەن اكە جانە بالا مەملەكەتتىڭ قورعاۋىندا بولادى» دەپ ناقتى كورسەتىلگەن. بۇل وتباسى قۇندىلىقتارى مەملەكەتتىك ساياساتتىڭ نەگىزگى وزەگىنە اينالعانىن ايقىن دالەلدەيدى. اكە – تەك وتباسىن اسىراۋشى ەمەس، بالانى جاۋاپكەرشىلىككە، ەڭبەكقورلىققا جانە وتانعا دەگەن سۇيىسپەنشىلىككە باۋليتىن العاشقى مەكتەپ.
بالانىڭ بولاشاعىنا اسەر ەتەتىن ەڭ قۋاتتى كۇش – وتباسىنداعى تاربيە، اكەنىڭ ونەگەسى. سوندىقتان، «ادال ادام»، «زاڭ مەن ءتارتىپ»، «تازا قازاقستان» سەكىلدى مەملەكەتتىك باستامالاردى قوعامدا ورنىقتىرۋ ەڭ الدىمەن وتباسىنان باستالۋى ءتيىس. بارشاڭىزدى ەل مۇددەسىنە ادال قىزمەت ەتۋگە جانە ۇرپاق تاربيەسىنە زور جاۋاپكەرشىلىكپەن قاراۋعا شاقىرامىن»، – دەدى مۇرات نالقوجاۇلى.
ءىس-شارادا وتباسى قۇندىلىقتارىن ناسيحاتتاپ، وسكەلەڭ ۇرپاق تاربيەسىنە ەلەۋلى ۇلەس قوسىپ جۇرگەن اكەلەر وبلىس اكىمىنىڭ العىس حاتىمەن جانە باعالى سىيلىقتارمەن ماراپاتتالدى. «اكەلەر وداعى» رەسپۋبليكالىق قوعامدىق بىرلەستىگى توراعاسىنىڭ ورىنباسارى بەكدايىر نىعمەتۇلى، ىشكى ىستەر ورگاندارىنىڭ ارداگەرى امىربەك بەردىبەكۇلى، جاس اقىن، رەسپۋبليكالىق عاني مۇراتباەۆ اتىنداعى جاستار سىيلىعىنىڭ يەگەرى اقجول عابيتۇلى، ونەگەلى اكە داۋلەت امانگەلدىۇلى، «باقىتتى ايەل» جوباسىنىڭ سپيكەرى نۇرساۋلە دۇيسەمبايقىزى تاقىرىپ اياسىندا مازمۇندى بايانداما جاسادى. «قازاقستان داۋىسى – 2023» جوباسىنىڭ ءفيناليسى نۇريسلام تىلەۋحان اسەم ءان ورىنداپ، وعان قوعامدىق بىرلەستىك اتىنان سمارت-تەلەديدار سىيعا بەرىلدى.
فورۋمدا «قىزىلوردا» سۋپەرماركەتىنىڭ جۇمىسشىسى كامالوۆ جاندوس قۇدايبەرگەنۇلىنا ءۇش بولمەلى پاتەردىڭ كىلتى تابىستالدى. جاندوس قۇدايبەرگەنۇلى – مۇمكىندىگى شەكتەۋلى جۇبايىنا جانە ەكى بالاسىنا قامقور بولىپ وتىرعان ارداقتى اكە.
