مادەنيەت جانە اقپارات مينيسترلىگىنىڭ قولداۋىمەن 2026 جىلدىڭ 27 ماۋسىمىندا روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمىندا 65-كونتسەرتتىك ماۋسىمنىڭ جابىلۋىنا ارنالعان اۋقىمدى «FOLK SHOW» گالا-كونتسەرتى ءوتتى.
«FOLK SHOW» – ۇلتتىق مۋزىكالىق مۇرانى زاماناۋي فورماتتا دارىپتەۋگە باعىتتالعان بىرەگەي كونتسەرتتىك جوبا. جوبانىڭ اۆتورى ءارى ديريجەرى – رەسپۋبليكالىق جانە حالىقارالىق بايقاۋلاردىڭ لاۋرەاتى، مادەنيەت سالاسىنىڭ ۇزدىگى، زاماناۋي مۋزىكا ونەرىنىڭ جارقىن وكىلى ادىلەت ازباەۆ.
گالا-كونتسەرتتە «Astana sazy» قازاق مەملەكەتتىك فولكلورلىق ءانسامبلى، قازاق مەملەكەتتىك سيمفونيالىق وركەسترى جانە G band-تىڭ ورىنداۋىنداعى الەمدىك حيتتەردى، تانىمال كينو جانە تەلەجوبالاردىڭ ساۋندترەكتەرىن، سونداي-اق قازاق مۋزىكاسىنىڭ كەڭىنەن تانىلعان تۋىندىلارى كورەرمەن نازارىنا ۇسىنىلدى.
سونداي-اق، مۋزىكالىق كەشتە «گۇلدەر» بي ءانسامبلى، «بىرلىك» بي ءانسامبلى، «Astana Musical» مەملەكەتتىك تەاترىنىڭ شىعارماشىلىق ۇجىمى، ەربول تاجىباەۆ، ايزادا كەمەل، ولجاس قۇرمانبەك، التىنشاش مۇقاتاەۆا، ديدار ابدۋحالىق، جاننا، نۇركەن ياكياەۆ، سامعار تولقىنحانۇلى جانە قازاقكونتسەرتتىڭ وزگە دە بەلگىلى ارتىستەرى ونەر كورسەتتى.
باعدارلامادا «Qazaq Symphony»، «شال»، «KZ Hits»، «دەتستۆو»، باتىرحان شۇكەنوۆ شىعارمالارىنا ارنالعان مۋزىكالىق كومپوزيتسيالار، «قازاقشا ترەند» توپتاماسى جانە قۇرمانعازىنىڭ «اداي» كۇيى سىندى قازاق مۋىزكاسىنىڭ التىن قورىنان تۋىندىلار جانە «La La Land»، «Avatar»، «Titanic»، «Game Evolution»، «Game of Thrones»، «ۆا-بانك» جانە «Bollywood Medley» سياقتى الەمدىك حيتتەر مەن كينويندۋستريانىڭ ۇزدىك ساۋندترەكتەرى دە كورەرمەننىڭ ىستىق ىقىلاسىنا بولەندى. كەش قوناقتارى ءتۇرلى باعىتتاعى شىعارمالاردى تىڭداپ قانا قويماي، حورەوگرافيالىق قويىلىمداردى تاماشالادى.
ايتا كەتەيىك، كونتسەرتتىڭ باستى ماقساتى – ۇلتتىق مۋزىكالىق ونەردى كەڭىنەن ناسيحاتتاۋ، حالىق اسپاپتارىنىڭ شىعارماشىلىق الەۋەتىن كورسەتۋ بولدى. وسىلايشا «قازاقكونتسەرت» 65-ماۋسىمنىڭ قورىتىندىسىندا ءداستۇرلى ونەردى قازىرگى زامانعى مۋزىكالىق ۇردىستەرمەن ساباقتاستىرا وتىرىپ، مىڭعا جۋىق كورەرمەنگە سان ءتۇرلى ەموتسيا سىيلاپ، جاڭا ماۋسىمعا دەيىن قوش ايتىستى.
كەش سوڭىندا قر مادەنيەت جانە اقپارات مينيسترلىگىنىڭ اتىنان «قازاقكونتسەرت» ۇجىمىنا «ىقىلاس گۇلى» تابىستالدى.
