سەنت-لۋيس قالاسىندا 10 جاستاعى بالاعا جەتى ايلىق ءسابيدىڭ ولىمىنە قاتىستى ادام ءولتىردى دەگەن ايىپ تاعىلدى، دەپ حابارلايدى "ادىرنا" ۇلتتىق پورتالى.
اقش باق دەرەگىنشە، بالا جەتى ايلىق ءسابيدى باسىنان اتىپ جىبەرگەن. وقيعادان كەيىن ءسابي اۋرۋحاناعا جەتكىزىلگەنىمەن، دارىگەرلەر ونىڭ ءومىرىن ساقتاپ قالا المادى. وقيعا كەزىندە ۇيدە تاعى ءبىر بالا بولعان.
پوليتسيانىڭ الدىن الا بولجامىنشا، اتىس قارۋى ۇيدەگى ماتراستىڭ استىندا ساقتالعان جانە وعان بالانىڭ ەركىن قول جەتكىزۋىنە مۇمكىندىك بولعان. ءىس بويىنشا قازا تاپقان ءسابيدىڭ 19 جاستاعى اكەسىنە دە ايىپ تاعىلدى. تەرگەۋ دەرەگىنە سايكەس، ول قارۋدى كامەلەتكە تولماعان بالانىڭ قولى جەتەتىن جەردە ساقتاعان.
تەرگەۋشىلەردىڭ مالىمەتىنشە، 10 جاستاعى بالا قارۋدىڭ قايدا ساقتالعانىن بىلگەن جانە بۇعان دەيىن دە وعان قول جەتكىزگەن. قازىرگى ۋاقىتتا وعان كامەلەتكە تولماعاندار ءىسى جونىندەگى سوتتا ءبىرىنشى دارەجەلى ادام ءولتىرۋ بابى بويىنشا ايىپ تاعىلدى.
ال ءسابيدىڭ اكەسى كەپىلمەن بوساتۋ قۇقىعىنسىز قاماۋعا الىندى. تەرگەۋ جالعاسىپ جاتىر.
