اقمولا وبلىسىندا «ادىلەتتى قازاقستان جولىنداعى كونستيتۋتسيانىڭ ءرولى» تاقىرىبىندا اكتيۆ وتىرىسى ءوتتى. جيىنعا مەملەكەتتىك ورگانداردىڭ وكىلدەرى، دەپۋتاتتار جانە قوعام بەلسەندىلەرى قاتىسىپ، 1 شىلدەدەن باستاپ كۇشىنە ەنگەن جاڭا كونستيتۋتسيانىڭ ماڭىزى مەن ونىڭ ەلدىڭ الداعى دامۋىنا ىقپالىن تالقىلادى.
جيىندى اشقان اقمولا وبلىسىنىڭ اكىمى مارات احمەتجانوۆ جاڭا كونستيتۋتسيانىڭ كۇشىنە ەنۋى قازاقستاننىڭ بولاشاق باعىتىن ايقىندايتىن تاريحي وقيعا ەكەنىن اتاپ ءوتتى. ونىڭ ايتۋىنشا، اتا زاڭ ەل دامۋىنىڭ جاڭا كەزەڭىن بەلگىلەپ، ۋاقىت تالابىنا تولىق جاۋاپ بەرەدى.
«جاڭا كونستيتۋتسيا – مەملەكەتتىڭ بولاشاعىن ايقىندايتىن ستراتەگيالىق قۇجات. ونىڭ نەگىزىندە ادىلدىك، زاڭ ۇستەمدىگى، ادامعا دەگەن قۇرمەت، ەڭبەككە دەگەن كوزقاراس جانە كەلەر ۇرپاق الدىنداعى جاۋاپكەرشىلىك قاعيداتتارى جاتىر. بارلىق وزگەرىستەردىڭ باستى ماقساتى – ازاماتتاردىڭ ءومىر ءسۇرۋ ساپاسىن ارتتىرۋ»، – دەدى مارات احمەتجانوۆ.
وبلىس اكىمى جاڭا نورمالاردى قابىلداۋمەن عانا شەكتەلمەي، ولاردىڭ ناقتى ومىردە جۇزەگە اسۋى ماڭىزدى ەكەنىن ايتتى. ونىڭ سوزىنشە، مەملەكەتتىك ورگانداردىڭ باستى مىندەتى – جۇرگىزىلىپ جاتقان رەفورمالاردىڭ ناتيجەسىن ءاربىر قازاقستاندىق سەزىنۋى ءۇشىن ءتيىمدى جۇمىس ىستەۋ.
كەزدەسۋ بارىسىندا اقمولا وبلىسىنىڭ دامۋ باعىتتارىنا دا توقتالدى. قازىرگى تاڭدا وڭىردە جاڭا تەحنولوگيالاردى ەنگىزۋگە باعىتتالعان جوبالار جۇزەگە اسىرىلىپ كەلەدى. اتاپ ايتقاندا، تسيفرلىق IT-كلاستەر قالىپتاستىرۋ، اگروونەركاسىپ كەشەنىندە زاماناۋي شەشىمدەردى پايدالانۋ جانە شەتەلدىك سەرىكتەستەرمەن بىرلەسىپ مال شارۋاشىلىعىنا جاڭا تاسىلدەردى ەنگىزۋ جۇمىستارى جۇرگىزىلۋدە.
وبلىس باسشىسى مۇنداي جوبالار ءوندىرىس تيىمدىلىگىن ارتتىرىپ، ءوڭىردىڭ ەكونوميكالىق الەۋەتىن كۇشەيتۋگە جانە ەلدىڭ ازىق-تۇلىك قاۋىپسىزدىگىن قامتاماسىز ەتۋگە ىقپال ەتەتىنىن اتاپ ءوتتى.
جيىن سوڭىندا قاتىسۋشىلار جاڭا كونستيتۋتسيا الداعى رەفورمالاردىڭ بەرىك نەگىزىنە اينالاتىنىن ايتىپ، ونىڭ تابىستى جۇزەگە اسۋى مەملەكەت پەن قوعامنىڭ بىرلەسكەن جۇمىسىنا بايلانىستى ەكەنىن جەتكىزدى.
