رەسەيدەگى ەڭ ءىرى مۇناي وڭدەۋ زاۋىتتارىنىڭ ءبىرى، قازاقستان شەكاراسىنا جاقىن ورنالاسقان ومبى مۇناي وڭدەۋ زاۋىتى العاش رەت شابۋىلعا ۇشىرادى. ASTRA باسىلىمىنىڭ حابارلاۋىنشا، 6 شىلدە كۇنى كۇندىز كۋاگەرلەر ومبى مۇناي وڭدەۋ زاۋىتىنا ء(وموز) جاسالعان سوققى تۋرالى جاريالاعان، دەپ حابارلايدى “ادىرنا”.
تۇسىرىلگەن بەينەجازبالاردا ونەركاسىپتىك نىساندا ءورت شىققانى كورىنەدى. ASTRA-نىڭ OSINT-تالداۋشىسىنىڭ مالىمەتىنشە، سوققى ءدال ومبى مۇناي وڭدەۋ زاۋىتىنا تيگەن.
ومبى وبلىسىنىڭ گۋبەرناتورى ۆيتالي حوتسەنكو دروندار شابۋىلىن جانە بىرنەشە نىساننىڭ زاقىمدانعانىن راستادى، الايدا مۇناي وڭدەۋ زاۋىتى تۋرالى ناقتى ايتقان جوق.
«رەسەي قورعانىس مينيسترلىگىنىڭ اۋە قورعانىسى كۇشتەرى قارسىلاستىڭ شابۋىلىن تويتارۋدى جالعاستىرىپ جاتىر. بىرنەشە ۇشقىشسىز ۇشۋ اپپاراتى ومبىنىڭ سولتۇستىك ونەركاسىپتىك ايماعىنا جەتە الدى. وقيعانىڭ سالدارىن جويۋ ءۇشىن جەدەل قىزمەتتەر قاجەتتى شارالاردى قابىلداپ جاتىر»، - دەدى ول.
بۇعان دەيىن، شامامەن جارتى ساعات بۇرىن، حوتسەنكو ومبى وبلىسى ۇستىندە بىرنەشە ۇشقىشسىز اپپاراتتىڭ اۋە قورعانىسى كۇشتەرىمەن جويىلعانىن حابارلاعان ەدى. ال شابۋىل تۋرالى العاشقى مالىمدەمەدەن ءبىر جارىم ساعات بۇرىن اسكەري مالىمەتكە سۇيەنە وتىرىپ، وڭىردە درون قاۋپى جاريالانعانىن ايتقان.
Dnepr Osint دەرەگىنشە، شابۋىل جاڭا ۇلگىدەگى FP-1 جاڭعىرتىلعان ۇشقىشسىز اپپاراتتارىمەن جاسالعان.
«جاڭعىرتىلعان FP-1 ۇشقىشسىز ۇشۋ اپپاراتتارى ۋكراينا شەكاراسىنان 2500 شاقىرىمنان استام قاشىقتىقتا ورنالاسقان ومبى مۇناي وڭدەۋ زاۋىتىنىڭ ەلوۋ-اۆت-11 قوندىرعىسىنا سوققى بەردى. تەحنولوگيالىق كولوننالارعا ءدال تيگەنى تىركەلدى»، – دەلىنگەن حابارلامادا.
ومبى مۇناي وڭدەۋ زاۋىتى «گازپروم نەفت» كومپانياسىنا تيەسىلى. 2025 جىلى اياقتالعان جاڭعىرتۋ جۇمىستارىنان كەيىن كاسىپورىن مۇنايدى وڭدەۋ تەرەڭدىگىن 100%-عا دەيىن جەتكىزگەن. 2024 جىلى زاۋىت 50-دەن استام ءونىم ءتۇرىن وندىرگەن، شىعارىلاتىن وتىننىڭ بارلىعى «ەۋرو-5» ەكولوگيالىق ستاندارتىنا سايكەس كەلەدى. كاسىپورىندا 3,3 مىڭنان استام ادام جۇمىس ىستەيدى. كومپانيانىڭ مالىمەتىنشە، بۇل رەسەيدەگى ەڭ ءىرى ون مۇناي وڭدەۋ زاۋىتىنىڭ ءبىرى جانە ۋكراينا شەكاراسىنان شامامەن 2900 شاقىرىم قاشىقتىقتا ورنالاسقان.
بۇعان دەيىن ومبى وبلىسىنىڭ گۋبەرناتورى بەنزين مەن ديزەل وتىنىن كانيسترلەرگە قۇيۋعا قويىلعان تىيىمنىڭ كۇشىن جويعانىن حابارلاعان.
ۋكراينالىق مونيتورينگتىك ارنالار رەسەيدەگى ەڭ ءىرى مۇناي وڭدەۋ زاۋىتى سانالاتىن ومبى مۇناي وڭدەۋ زاۋىتىنا شابۋىل جاسالعانىن حابارلادى.
جىلىنا 22 ميلليون توننادان استام مۇناي وڭدەۋ قۋاتىنا يە ومبى مۇناي وڭدەۋ زاۋىتى «گازپروم نەفت» كومپانياسىنا قارايدى. كاسىپورىن رەسەيدىڭ ىشكى نارىعىنا جەتكىزىلەتىن بەنزيننىڭ ەلەۋلى بولىگىن وندىرەدى، سونداي-اق ەكسپورتقا دا ءونىم شىعارادى. مونيتورينگتىك ارنالاردىڭ مالىمەتىنشە، زاۋىت ۋكراينا شەكاراسىنان شامامەن 2,5 مىڭ شاقىرىم جەردە ورنالاسقان.
