ارمەنيا كاسىپورىندارى قازىردىڭ وزىندە ەۋرازيالىق ەكونوميكالىق وداققا (ەاەو) مۇشە ەلدەردىڭ ونەركاسىپتىك كووپەراتسيا جوبالارىنا قاتىسىپ كەلەدى. بۇل تۋرالى ارمەنيانىڭ پرەمەر-ءمينيسترى نيكول پاشينيان ەكاتەرينبۋرگتە وتكەن «يننوپروم-2026» حالىقارالىق ونەركاسىپتىك كورمەسى اياسىنداعى «يندۋستريا 360. شەكاراسىز ءوندىرىس» پلەنارلىق وتىرىسىندا مالىمدەدى، دەپ حابارلايدى “ادىرنا”.
پاشينيان رەسەي ۇكىمەتىنىڭ توراعاسى ميحايل ميشۋستينگە كورمەگە شاقىرعانى ءۇشىن العىس ايتىپ، ءىس-شارانىڭ جوعارى دەڭگەيدە ۇيىمداستىرىلعانىن اتاپ ءوتتى.
پرەمەر-ءمينيستردىڭ ايتۋىنشا، ونەركاسىپتىك كووپەراتسيا جوبالارىن قارجىلاي قولداۋ ەاەو-نىڭ ينتەگراتسيالىق ماقساتتارىنا قول جەتكىزۋ جانە ۇيىمعا مۇشە مەملەكەتتەردىڭ ونەركاسىپ سالاسىنىڭ باسەكەگە قابىلەتتىلىگىن ارتتىرۋ ءۇشىن اسا ماڭىزدى. ونىڭ ايتۋىنشا، بۇل الەمدىك ونەركاسىپتىڭ قارقىندى وزگەرىپ، عىلىمدى كوپ قاجەت ەتەتىن وندىرىستەر مەن جاساندى ينتەللەكت جانە دەرەكتەردى تالداۋ تەحنولوگيالارىنا كوبىرەك سۇيەنە باستاعان كەزەڭىندە ەرەكشە وزەكتى.
پاشينيان سونداي-اق ارمەنيانىڭ ونەركاسىپ سالاسى سوڭعى جىلدارى تۇراقتى ءوسىم كورسەتىپ وتىرعانىن ايتتى. 2025 جىلى ونەركاسىپ ءوندىرىسىنىڭ كولەمى 2024 جىلمەن سالىستىرعاندا 4,7 پايىزعا ارتقان. ال بيىلعى جىلدىڭ العاشقى ءتورت ايىندا ءوسىم 13 پايىزدى قۇراعان. سوڭعى توعىز جىل ىشىندە ەلدەگى وڭدەۋ ونەركاسىبىنىڭ كولەمى ەكى ەسەگە ۇلعايعان.
ونىڭ ايتۋىنشا، ارمەنيانىڭ ەكونوميكالىق ساياساتىنىڭ نەگىزگى باعىتتارىنىڭ ءبىرى – تسيفرلاندىرۋ مەن دەرەكتەردى تالداۋ قۇرالدارىن پايدالانۋ ارقىلى تەحنولوگيالىق دامۋدى قامتاماسىز ەتەتىن عىلىمدى قاجەت ەتەتىن وندىرىستەردى دامىتۋ. سونىمەن قاتار ەلدە زاماناۋي ەڭبەك نارىعى قالىپتاستىرىلىپ، كاسىپتىك ءبىلىم بەرۋ جۇيەسى جاڭعىرتىلىپ جاتىر.
«سوڭعى جىلدارداعى اۋقىمدى ينۆەستيتسيالار ەلىمىزدىڭ جوعارى تەحنولوگيالار سالاسىندا ۇزاق مەرزىمدى ستراتەگيالىق كوزقاراسى بار سەنىمدى سەرىكتەس رەتىندە قابىلدانا باستاعانىن كورسەتەدى»، – دەدى ارمەنيا پرەمەر-ءمينيسترى.
وسىدان كەيىن ەكاتەرينبۋرگتەگى «يننوپروم» حالىقارالىق كورمەسى اياسىندا نيكول پاشينيان مەن رەسەي ۇكىمەتىنىڭ توراعاسى ميحايل ءميشۋستيننىڭ ەكىجاقتى كەلىسسوزدەرى باستالدى.
