«قازمۇنايگاز» ۇلتتىق كومپانياسىنىڭ ورتالىق اپپاراتىندا اۋقىمدى قىسقارتۋ جۇرگىزىلدى. وڭتايلاندىرۋ اياسىندا قىزمەتكەرلەردىڭ 10 پايىزى جۇمىسىنان بوساتىلعان. كادرلىق وزگەرىستەر تۋرالى ۇكىمەتتەگى بريفينگتە ۇلتتىق كومپانيا باسقارماسىنىڭ توراعاسى اسحات حاسەنوۆ مالىمدەدى، دەپ حابارلايدى «ادىرنا» ءتىلشىسى.
«10 پايىز — بۇل 47 ادام»، — دەپ ناقتىلادى ول.
جۋرناليستەر جۇمىستان بوساتىلعان توپ-مەنەدجەرلەر مەن باس كەڭسە ماماندارىنا قانداي الەۋمەتتىك قولداۋ مەن وتەماقى قاراستىرىلعانىن، سونداي-اق بۇل ماقساتقا كومپانيا بيۋدجەتىنەن قانشا قاراجات بولىنگەنىن سۇرادى. الايدا «قازمۇنايگاز» باسشىسى ناقتى سانداردى اتاۋدان باس تارتىپ، بۇرىنعى قىزمەتكەرلەردىڭ قۇقىقتارى بۇزىلمايتىنىنا سەندىردى.
«بارلىعى ەڭبەك زاڭناماسى مەن ناقتى ەڭبەك شارتتارىنىڭ تالاپتارىنا سايكەس جۇرگىزىلەدى»، — دەدى حاسەنوۆ.
بۇعان دەيىن پرەزيدەنت قاسىم-جومارت توقاەۆ «سامۇرىق-قازىنا» قورى مەن ونىڭ قۇرامىنداعى ۇلتتىق كومپانيالاردىڭ قۇرىلىمى نەگىزسىز ۇلعايىپ كەتكەنىن اشىق ايتقان ەدى.
