«QazMūnaiGaz» ūlttyq kompaniiasynyŋ ortalyq apparatynda auqymdy qysqartu jürgızıldı. Oŋtailandyru aiasynda qyzmetkerlerdıŋ 10 paiyzy jūmysynan bosatylǧan. Kadrlyq özgerıster turaly Ükımettegı brifingte ūlttyq kompaniia basqarmasynyŋ töraǧasy Ashat Hasenov mälımdedı, dep habarlaidy «Adyrna» tılşısı.
«10 paiyz — būl 47 adam», — dep naqtylady ol.
Jurnalister jūmystan bosatylǧan top-menedjerler men bas keŋse mamandaryna qandai äleumettık qoldau men ötemaqy qarastyrylǧanyn, sondai-aq būl maqsatqa kompaniia biudjetınen qanşa qarajat bölıngenın sūrady. Alaida «QazMūnaiGaz» basşysy naqty sandardy ataudan bas tartyp, būrynǧy qyzmetkerlerdıŋ qūqyqtary būzylmaitynyna sendırdı.
«Barlyǧy eŋbek zaŋnamasy men naqty eŋbek şarttarynyŋ talaptaryna säikes jürgızıledı», — dedı Hasenov.
Būǧan deiın prezident Qasym-Jomart Toqaev «Samūryq-Qazyna» qory men onyŋ qūramyndaǧy ūlttyq kompaniialardyŋ qūrylymy negızsız ūlǧaiyp ketkenın aşyq aitqan edı.
