اۋعانستانداعى «تاليبان» قوزعالىسى ەلدە ەلەكتر ەنەرگياسىن ءوندىرۋ مەن تاسىمالداۋ جۇيەسىن كەڭەيتۋگە ارنالعان بەس جىلدىق جوسپاردى بەكىتتى. بۇل تۋرالى قوزعالىس ۇكىمەتى باسشىسىنىڭ ەكونوميكالىق ماسەلەلەر جونىندەگى ورىنباسارى ابدۋل عاني باراداردىڭ كەڭسەسى ايتتى، دەپ حابارلايدى «ادىرنا» ءتىلشىسى RTA.af-عا سىلتەمە جاساپ.
جوسپار بۇعان دەيىن تالىپتەردىڭ ەكونوميكالىق كوميسسياسىندا ماقۇلدانعان بولاتىن. ەندى ونى قوزعالىستىڭ جوعارعى جەتەكشىسى حايباتۋللا احۋندزادا دا بەكىتتى. باعدارلاما ەنەرگەتيكا سالاسىن دامىتۋعا، ەكونوميكالىق ءوسىمدى قولداۋعا جانە يمپورتتىق ەلەكتر ەنەرگياسىنا تاۋەلدىلىكتى ازايتۋعا باعىتتالعان. مالىمدەمەدە قۇجاتتىڭ ەلەكتر قۋاتى تاپشىلىعى ماسەلەسىن جۇيەلى تۇردە شەشۋگە ارنالعانى اتاپ وتىلگەن.
جوسپارعا جەرگىلىكتى رەسۋرستاردى پايدالانۋ ارقىلى ەلەكتر ەنەرگياسىن وندىرەتىن 25 جوبا ەنگىزىلگەن. ولاردىڭ قاتارىندا سۋ ەلەكتر ستانتسيالارى، كۇن جانە جەل ەنەرگەتيكاسى، سونداي-اق كومىر نەگىزىندەگى ەلەكتر ءوندىرىسى بار. سونىمەن قاتار قۇجاتتا ەلەكتر جەلىلەرىن كەڭەيتۋگە ارنالعان 13 جوبانى اياقتاۋ جانە 23 جاڭا جوبانى ىسكە قوسۋ قاراستىرىلعان.
بۇدان بولەك، ەنەرگەتيكالىق ينفراقۇرىلىمدى دامىتۋ اياسىندا 21 قوسالقى ستانتسيانىڭ قۇرىلىسىن اياقتاۋ، تاعى 21 جاڭا قوسالقى ستانتسيا سالۋ جانە ەلەكتر ەنەرگياسىن تاراتۋعا قاتىستى 34 جوبانى جۇزەگە اسىرۋ جوسپارلانعان.
الايدا «تاليبان» رەسمي مالىمدەمەسىندە باعدارلامانىڭ جالپى قۇنى، قارجىلاندىرۋ كوزدەرى، كۇتىلەتىن وندىرىستىك قۋات كولەمى جانە جوبالاردى ىسكە اسىرۋ كەستەسى تۋرالى ناقتى اقپارات بەرىلمەگەن.
اۋعانستان ءالى كۇنگە دەيىن كورشى ەلدەردەن جەتكىزىلەتىن ەلەكتر ەنەرگياسىنا ايتارلىقتاي تاۋەلدى. بۇۇ دامۋ باعدارلاماسىنىڭ ماۋسىم ايىنداعى دەرەگىنە سايكەس، ەل تۇتىناتىن ەلەكتر ەنەرگياسىنىڭ شامامەن 80 پايىزىن يمپورتتايدى. ونىڭ 90 پايىزدان استامى ورتالىق ازيا مەملەكەتتەرىنەن، قالعان بولىگى يراننان جەتكىزىلەدى.
سوڭعى ەنەرگەتيكالىق ەسەپتەرگە سايكەس، اۋعانستاننىڭ ىشكى ءوندىرىسى شامامەن 250 مۆت بولسا، يمپورت كولەمى وزبەكستان، تاجىكستان، تۇرىكمەنستان جانە يراننان كەلەتىن 800 مۆت-قا جۋىق ەلەكتر ەنەرگياسىن قۇرايدى.
اۋعان ەنەرگەتيكتەرىنىڭ باعالاۋىنشا، ىشكى سۇرانىستى تولىق قامتاماسىز ەتۋ ءۇشىن ەلگە 6000–7000 مۆت ەلەكتر قۋاتى قاجەت. ونەركاسىپتىك بەلسەندىلىك ايتارلىقتاي ارتقان جاعدايدا بۇل كورسەتكىش 10 000 مۆت-قا دەيىن جەتۋى مۇمكىن.
سوڭعى جىلدارى «تاليبان» بىرنەشە ءىرى ەنەرگەتيكالىق جوبانى جاريالاعانىمەن، ولاردىڭ كوبى ءالى قۇرىلىس كەزەڭىندە نەمەسە ىسكە اسىرۋدىڭ باستاپقى ساتىسىندا تۇر. جۋىردا اۋعانستاننىڭ ۇلتتىق ەنەرگەتيكالىق كومپانياسى جالپى جوسپارلانعان قۋاتى 1820 مۆت بولاتىن 17 ەلەكتر ءوندىرۋ جوباسى بويىنشا كەلىسىمشارتتارعا قول قويىلعانىن حابارلاعان ەدى. بۇل جوبالاردا دا سۋ، كۇن، جەل ەنەرگياسى مەن كومىر رەسۋرستارى پايدالانىلماق.
