قازاقستان پرەزيدەنتى قاسىم-جومارت توقاەۆ دونالد ترامپپەن تەلەفون ارقىلى سويلەستى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردانىڭ ءباسپاسوز قىزمەتى حابارلادى.
اڭگىمە بارىسىندا مەملەكەت باسشىسى دونالد ترامپتى اقش تاۋەلسىزدىگىنىڭ 250 جىلدىعىمەن قۇتتىقتاپ، قىسقا تاريحي كەزەڭ ىشىندە ەلدىڭ قۋاتتى جاھاندىق دەرجاۆاعا اينالعانىن اتاپ ءوتتى.
پرەزيدەنت قاسىم-جومارت توقاەۆ اقش اكىمشىلىگىنىڭ ىشكى ساياسي باعىتى قازاقستاندا جۇزەگە اسىرىلىپ جاتقان «زاڭ مەن ءتارتىپ» قاعيداتىنا نەگىزدەلگەن ادىلەتتى قازاقستان قۇرۋ ستراتەگياسىمەن ۇندەس ەكەنىن ايتىپ، دونالد ترامپ جۇرگىزىپ وتىرعان ساياساتقا قولداۋ ءبىلدىردى.
تاراپتار تەلەفون ارقىلى اڭگىمەلەسۋ بارىسىندا ەكىجاقتى ەكونوميكالىق ىنتىماقتاستىق پەن ساياسي ءوزارا ءىس-قيمىلدىڭ وزەكتى ماسەلەلەرىن تالقىلادى. مەملەكەت باسشىسى بىلتىر قاراشا ايىندا ۆاشينگتونعا جاساعان ساپارى كەزىندە قول جەتكىزىلگەن كەلىسىمدەردىڭ تابىستى جۇزەگە اسىرىلىپ جاتقانىن جەتكىزدى.
سونداي-اق اقوردادا اقش سەناتورى ستيۆ دەينس، اقش پرەزيدەنتىنىڭ ارناۋلى وكىلى سەردجيو گور جانە اق ءۇيدىڭ وزگە دە جوعارى لاۋازىمدى وكىلدەرىمەن، امەريكالىق بيزنەس قاۋىمداستىعى مۇشەلەرىمەن وتكەن كەزدەسۋلەردىڭ ناتيجەلەرى وڭ باعالاندى.
اڭگىمە سوڭىندا قاسىم-جومارت توقاەۆ دونالد ترامپتى وزىنە قولايلى ۋاقىتتا قازاقستانعا رەسمي ساپارمەن كەلۋگە شاقىردى.
