اقش پرەزيدەنتى دونالد ترامپ قاتار سىيعا تارتقان جاڭا Boeing 747 ۇشاعىن العاش رەت كوپشىلىككە كورسەتتى، دەپ حابارلايدى "ادىرنا" ۇلتتىق پورتالى.
بولاشاقتا بۇل اۋە كەمەسى پرەزيدەنتتىڭ نەگىزگى رەسمي بورتى رەتىندە پايدالانىلماق.
ۆاشينگتون ماڭىنداعى ەندريۋس اسكەري اۋە بازاسىندا وتكەن تانىستىرۋ كەزىندە ترامپ قازىرگى پرەزيدەنتتىك ۇشاقپەن جاساعان سوڭعى ساپارىن اياقتاعانىن ايتىپ، جاڭا اۋە كەمەسىن جوعارى باعالادى. ونىڭ سوزىنشە، بۇل ۇشاق بارلىق جاعىنان ۇزدىك جانە بۇرىن-سوڭدى بولماعان ءسان-سالتاناتقا يە «ۇشاتىن اق ۇيگە» اينالادى.
جوسپار بويىنشا جاڭا پرەزيدەنتتىك بورت اقش-تىڭ 250 جىلدىعىنا ارنالعان 4 شىلدەدەگى مەرەكەلىك ءىس-شارا اياسىندا ەل استاناسىنىڭ ۇستىمەن سالتاناتتى تۇردە ۇشىپ وتەدى. ساراپشىلاردىڭ باعالاۋىنشا، ۇشاقتىڭ قۇنى شامامەن 400 ميلليون دوللاردى قۇرايدى. الايدا ونى پرەزيدەنت قاجەتتىلىكتەرىنە بەيىمدەۋ جانە ارنايى جابدىقتاۋ جۇمىستارىنا قوسىمشا ميلليارد دوللارعا جۋىق قارجى جۇمسالۋى مۇمكىن دەگەن پىكىرلەر ايتىلۋدا.
سونىمەن قاتار قاتاردىڭ بۇل سىيلىعى اقش-تا قىزۋ پىكىرتالاس تۋدىردى. كەيبىر ساياساتكەرلەر مەن ساراپشىلار قاۋىپسىزدىك جانە ەتيكا ماسەلەلەرىنە الاڭداۋشىلىق ءبىلدىرىپ وتىر. بۇعان قوسا، ترامپ ۇشاقتى بولاشاق پرەزيدەنتتەرگە قالدىرماي، كەيىننەن ءوز اتىمەن اتالاتىن پرەزيدەنتتىك كىتاپحانا قورىنا بەرۋدى جوسپارلاپ وتىرعانى دا تالقىلانۋدا.
