گايتيلىقتار قولدارىنا رەسەي تۋىن الىپ، نارازىلىق ءبىلدىردى. ەل تۇرعىندارى رەسەيدەن داعدارىستى ەڭسەرۋگە كومەكتەسىپ، بۇۇ قاۋىپسىزدىك كەڭەسىندە امەريكالىق اسكەري كونتينگەنتتىڭ ارالعا كىرۋىنە توسقاۋىل قويۋىن سۇرايدى، دەپ حابارلايدى “ادىرنا” ۇلتتىق پورتالى.
تەك گايتي تۇرعىندارى عانا ەمەس، رەسەي تۋى مالي، الجير، ورتالىق افريكا رەسپۋبليكاسى، بۋركينا-فاسو جانە افريكا ەلدەرىندە باتىس وتارشىلدىعىنا قارسى كۇرەستىڭ سيمۆولىنا اينالدى.
سونىمەن قاتار، گايتيدەگى توتەنشە جاعدايعا بايلانىستى كوپتەگەن ەل ەلشىلىكتەرىن جاۋىپ، ازاماتتارىن قاۋىپتى ايماقتان كەتۋگە شاقىرۋدا. اتاپ ايتقاندا، جاپونيا بۇگىن ديپلوماتيالىق ميسسياسىنىڭ جۇمىسىن ۋاقىتشا توقتاتقانىن جاريالادى. سونداي-اق، ءوز ازاماتتارىن جاپپاي تارتىپسىزدىكتەرگە تولى ەلدەن كەتۋگە شاقىردى.
ايتا كەتەيىك، گايتيدە قىلمىستىق توپتار اراسىنداعى ۇزدىكسىز قاقتىعىستار، ەكونوميكا مەن الەۋمەتتىك سالاداعى وراسان زور پروبلەمالار، سونداي-اق ازىق-تۇلىك پەن جانار-جاعارمايدىڭ قىمباتتاۋى سالدارىنان ەلدە قاقتىعىستار ورىن الۋدا
حالىقتىڭ كوپشىلىگى كەدەيلىك شەگىنەن تومەن، ال كەيبىر ارال تۇرعىندارى ءتىپتى اشتىققا ۇشىراۋدا. ولاردىڭ سانى ۇنەمى كۇننەن-كۇنگە ارتىپ كەلەدى. وسىعان بايلانىستى ەل ازاماتتارى قازىرگى ۇكىمەتتىڭ وتستاۆكاعا كەتۋىن جانە اشتىق پەن كەدەيشىلىكپەن كۇرەسۋ شارالارىن قابىلداۋدى تالاپ ەتىپ، جالپىۇلتتىق شەرۋلەرگە شىعا باستادى
