فوتو: Global Look Press/IMAGO/Wolfgang Maria Weber
اقش-تىڭ وڭتۇستىك كارولينا شتاتىنان سايلانعان رەسپۋبليكالىق سەناتور ليندسي گرەم 71 جاسىندا قايتىس بولدى. ونىڭ كەڭسەسى ساياساتكەردىڭ 11 شىلدە كۇنى كەشكە قىسقا مەرزىمدى ءارى كەنەتتەن بولعان سىرقاتتان كوز جۇمعانىن جەتكىزدى، دەپ حابارلايدى “ادىرنا”.
قايتىس بولاردان ءبىر كۇن بۇرىن، 10 شىلدەدە گرەم ۋكرايناعا جۇمىس ساپارىمەن بارىپ، كيەۆتە پرەزيدەنت ۆلاديمير زەلەنسكيمەن كەزدەستى. سونداي-اق ول قورعانىسقا ارنالعان ۇشقىشسىز ۇشۋ اپپاراتتارىن شىعاراتىن SkyFall كومپانياسىنىڭ ءوندىرىس ورنىن ارالاعان. كەزدەسۋ بارىسىندا ۋكرايناداعى سوعىستى توقتاتۋ جونىندەگى كەلىسسوزدەر مەن رەسەيگە قارسى سانكتسيالاردى كۇشەيتۋ ماسەلەلەرى تالقىلاندى.
ليندسي گرەم اقش-تىڭ وڭتۇستىك كارولينا شتاتىنان سايلانعان ىقپالدى رەسپۋبليكالىق سەناتورلاردىڭ ءبىرى بولدى. ساياسي مانسابىنىڭ العاشقى كەزەڭىندە ول اقش پرەزيدەنتى دونالد ترامپتى قاتاڭ سىناعانىمەن، كەيىن ونىڭ ەڭ سەنىمدى ساياسي سەرىكتەستەرىنىڭ بىرىنە اينالدى.
1994 جىلى گرەم وڭتۇستىك كارولينا شتاتىنان اقش وكىلدەر پالاتاسىنا سايلاندى. ال 2002 جىلى اقش سەناتىنىڭ مۇشەسى اتاندى.
قورعانىس ماسەلەلەرىندە قاتاڭ ۇستانىمىمەن تانىلعان ليندسي گرەم اقش-تىڭ ۇلتتىق قاۋىپسىزدىك مۇددەلەرىن قورعاۋعا باعىتتالعان ساياساتتى تۇراقتى تۇردە قولداپ كەلدى. ونىڭ رەسمي سايتىندا تەرروريزمگە قارسى كۇرەستە ەلدىڭ ۇزاق مەرزىمدى قاۋىپسىزدىگىن قامتاماسىز ەتۋگە كۇش سالعانى ايتىلعان.
سوڭعى جىلدارى ول سەناتتىڭ بيۋدجەت كوميتەتىن باسقاردى. سونىمەن قاتار اسسيگنوۆانيالار، زاڭ ماسەلەلەرى، قورشاعان ورتا جانە قوعامدىق جۇمىستار جونىندەگى كوميتەتتەردىڭ قۇرامىندا جۇمىس ىستەدى.
ليندسي گرەم وتباسىن قۇرماعان. ول وڭتۇستىك كارولينا شتاتىنداعى سەنەكا قالاسىندا تۇرعان.
