2025 جىلعى مامىردا ءۇش جىلعا باس بوستاندىعىنان ايىرىلعان بۇرىنعى مادەنيەت جانە سپورت ۆيتسە-ءمينيسترى ەرلان قوجاعاپانوۆ بوستاندىققا شىقتى. ىشكى ىستەر مينيسترلىگىنىڭ قىلمىستىق-اتقارۋ جۇيەسى كوميتەتى الەۋمەتتىك جەلىلەردە تاراعان اقپاراتتى راستاپ، قوجاعاپانوۆتىڭ سوت شەشىمىمەن مەرزىمىنەن بۇرىن بوساتىلعانىن مالىمدەدى، دەپ حاباردايدى "ادىرنا".
كوميتەتتىڭ حابارلاۋىنشا، سوت ونىڭ جازاسىنىڭ وتەلمەگەن بولىگىن ايىپپۇلمەن الماستىرۋ تۋرالى شەشىم قابىلداعان.
«جازانى اۋىستىرۋ، شارتتى تۇردە مەرزىمىنەن بۇرىن بوساتۋ جانە ۇكىمنىڭ ورىندالۋىنا قاتىستى وزگە دە ماسەلەلەر بويىنشا ماتەريالداردى قاراۋ جانە شەشىم قابىلداۋ تەك سوت ورگاندارىنىڭ قۇزىرەتىنە جاتادى»، – دەپ ءتۇسىندىردى قاجك.
ەسكە سالساق، 2024 جىلعى ناۋرىزدا سىبايلاس جەمقورلىققا قارسى قىزمەت ەرلان قوجاعاپانوۆتى اۋىر سىبايلاس جەمقورلىق قىلمىسىن جاسادى دەگەن كۇدىكپەن ۇستاعان بولاتىن.
كەيىن ونىڭ ءىسى سوتقا جولداندى. سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى دارحان قۇراقباەۆتىڭ ايتۋىنشا، ءىس بويىنشا كەلتىرىلگەن شىعىن كولەمى 1 ميلليارد تەڭگەدەن اسقان.
2025 جىلعى مامىردا سوت ەرلان قوجاعاپانوۆتى كىنالى دەپ تانىپ، ءۇش جىلعا باس بوستاندىعىنان ايىرۋ تۋرالى ۇكىم شىعارعان ەدى.
ەرلان قوجاعاپانوۆ ءار جىلدارى استانا قالاسى اكىمىنىڭ ورىنباسارى، سپورت جانە دەنە شىنىقتىرۋ ىستەرى اگەنتتىگىنىڭ توراعاسى، قازاقستان فۋتبول فەدەراتسياسىنىڭ پرەزيدەنتى، مادەنيەت جانە سپورت ۆيتسە-ءمينيسترى، الماتى اكىمىنىڭ ءبىرىنشى ورىنباسارى، پرەمەر-ءمينيستردىڭ كەڭەسشىسى جانە «استانا» فۋتبول كلۋبى ديرەكتورلار كەڭەسىنىڭ توراعاسى قىزمەتتەرىن اتقارعان.
