قىرعىزستان مۇناي جانە جانارمايمەن تۇراقتى قامتاماسىز ەتۋ ءۇشىن ونىمدەردى ەكسپورتتاۋعا تىيىم سالدى، دەپ حابارلايدى "ادىرنا" ءتىلشىسى.
سونىمەن قاتار ەلگە اۆتوكولىكپەن مۇناي ونىمدەرىن اكەلۋگە قاتىستى بۇرىنعى شەكتەۋلەردىڭ كۇشى 2027 جىلدىڭ 1 ساۋىرىنە دەيىن توقتاتىلدى.
قىرعىز رەسپۋبليكاسى مينيسترلەر كابينەتى 2026 جىلعى 13 شىلدەدە №484 قاۋلى قابىلداپ، مۇناي مەن مۇناي ونىمدەرىنىڭ يمپورتى مەن ەكسپورتىنا قاتىستى بۇرىنعى قاۋلىلارعا وزگەرىستەر ەنگىزدى.
جاڭا قۇجاتقا سايكەس، 2019 جىلى ەنگىزىلگەن قىرعىزستان اۋماعىنا اۆتوكولىك ارقىلى مۇناي مەن مۇناي ونىمدەرىنىڭ كەيبىر تۇرلەرىن اكەلۋگە قويىلعان ۋاقىتشا تىيىمنىڭ كۇشى 2026 جىلعى 25 مامىردان 2027 جىلعى 1 ساۋىرگە دەيىن توقتاتىلدى. بۇل كەزەڭدە اتالعان شەكتەۋ قولدانىلمايدى.
سونىمەن قاتار، بيلىك مۇناي مەن مۇناي ونىمدەرىن قىرعىزستان اۋماعىنان اۆتوموبيل جانە تەمىرجول كولىگىمەن شىعارۋعا ۋاقىتشا تىيىم ەنگىزدى. شەكتەۋ ەلدىڭ ىشكى نارىعى تولىق قامتاماسىز ەتىلگەنگە دەيىن نەمەسە ەۋرازيالىق ەكونوميكالىق وداقتىڭ مۇناي مەن مۇناي ونىمدەرىنىڭ ورتاق نارىعى قۇرىلعانعا دەيىن كۇشىندە بولادى.
تىيىم ەاەو سىرتىنداعى ەلدەرگە عانا ەمەس، جالپى قىرعىزستاننان مۇناي مەن مۇناي ونىمدەرىن شىعارۋعا قاتىستى قولدانىلادى. الايدا مينيسترلەر كابينەتىنىڭ ارنايى شەشىمىمەن قايتا وڭدەۋگە جىبەرىلەتىن نافتا، مازۋت جانە پەش وتىنى بۇل تالاپتان تىس قالادى. مۇنداي ونىمدەر كەيىن قايتادان قىرعىزستانعا اكەلىنۋى ءتيىس.
قاۋلى رەسمي جاريالانعان كۇننەن باستاپ كۇشىنە ەندى.
