موڭعولياداعى كەمپينگ اۋماعىندا يزرايلدىك 6 تۋريست شابۋىلعا ۇشىرادى. بۇل تۋرالى «كان» تەلەارناسى جاريالادى، دەپ حابارلايدى “ادىرنا”.
وقيعا وسى اپتادا بولعان. ءۇش ەر ادام مەن ءۇش ايەلدەن قۇرالعان توپ كولىكپەن موڭعوليانى ارالاپ ءجۇرىپ، كەمپينگكە توقتاعان كەزدە بەلگىسىز ءبىر توپتىڭ شابۋىلىنا ۇشىراعان.
زارداپ شەككەندەردىڭ ايتۋىنشا، شابۋىل جاساعاندار پىشاق پەن بالتامەن قارۋلانىپ، انتيسەميتتىك ۇراندار، سونىڭ ىشىندە «حايل گيتلەر» دەگەن سوزدەردى ايتقان. سونداي-اق ولاردى قازاق مۇسىلماندارى بولعانى ايتىلعان. الايدا بۇل اقپارات ازىرگە تاۋەلسىز دەرەككوزدەر ارقىلى رەسمي تۇردە راستالعان جوق.
وقيعا كەزىندە يزرايل قورعانىس ارمياسىنىڭ (تساحال) جاۋىنگەرلىك بولىمدەرىندە بۇرىن قىزمەت ەتكەن ءۇش تۋريست قارسىلىق كورسەتىپ، توپتىڭ قاۋىپسىز جەرگە كەتۋىنە مۇمكىندىك جاساعان. سونىڭ وزىندە توپ مۇشەلەرىنىڭ ءبىرى اۋىر جاراقات الىپ، جاق سۇيەگى سىنعان. ول كەيىن يزرايلگە جەتكىزىلىپ، ەم قابىلداپ جاتىر.
ءيزرايلدىڭ سىرتقى ىستەر مينيسترلىگى ازىرگە وقيعاعا قاتىستى رەسمي مالىمدەمە جاساعان جوق. دەگەنمەن قىتايداعى يزرايل ەلشىلىگى مەن شەتەلدەگى يزرايلدىكتەر ءىسى جونىندەگى دەپارتامەنت تۋريستەرگە قولداۋ كورسەتىپ، ولاردىڭ موڭعوليادان قاۋىپسىز شىعۋىنا كومەكتەسكەن.
الدىن الا مالىمەت بويىنشا، بۇعان دەيىن موڭعوليادا يزرايل ازاماتتارىنا نەمەسە ەۆرەيلەرگە قارسى انتيسەميتتىك سيپاتتاعى وقيعالار تىركەلمەگەن. قازىرگى ۋاقىتتا شابۋىلدىڭ ناقتى سەبەپتەرى مەن ءمان-جايى انىقتالىپ جاتىر.
موڭعوليا يزرايل ازاماتتارىنا ءبىر ايعا دەيىن ۆيزاسىز كىرۋگە مۇمكىندىك بەرەدى. ەكى مەملەكەت اراسىنداعى ديپلوماتيالىق قارىم-قاتىناسقا شامامەن 30 جىل بولعان.
