ۋكراينا پرەزيدەنتى رەسەيمەن سوعىس قيمىلدارىن قازىرگى مايدان شەبىندە توقتاتۋ قاقتىعىستى اياقتاۋدىڭ ىقتيمال جولدارىنىڭ ءبىرى ەكەنىن ايتتى، دەپ حابارلايدى “ادىرنا” Fox News-قا سىلتەپ.
تەلەارنا ءتىلشىسى زەلەنسكيدەن ۋكراينا اۋماعىنىڭ باسىم بولىگى كيەۆتىڭ باقىلاۋىندا قالاتىن، ال سوعىس قازىرگى پوزيتسيالاردا توقتاتىلاتىن كەلىسىمگە كەلۋگە دايىن با ەكەنىن سۇرادى.
ۋكراينا باسشىسى قينالا جاۋاپ بەرىپ، الدىمەن وق اتۋدى توقتاتىپ، مايدان شەبىندەگى جاعدايدى تۇراقتاندىرۋ قاجەت ەكەنىن ايتتى. ونىڭ پىكىرىنشە، بۇل سوعىستى اياقتاۋعا مۇمكىندىك بەرەتىن ناقتى قادام بولۋى مۇمكىن.
زەلەنسكي ەل اۋماعىنىڭ 75 پايىزى نەمەسە ودان دا كوپ بولىگى ۋكراينا باقىلاۋىندا قالاتىن بەيبىت كەلىسىم تۋرالى سۇراققا:
ء"يا، قازىر بىزگە [مايدان شەبىن] توقتاتىپ قويۋ قاجەت. مەنىڭشە، بۇل - سوعىستى اياقتاۋدىڭ ناقتى جولى. پرەزيدەنت ترامپ ايتقانداي، ءبىز مۇنى وق اتۋدى توقتاتۋ نەمەسە ادام ءولتىرۋدى دوعارۋ دەپ اتايمىز", - دەپ جاۋاپ بەردى.
زەلەنسكيدىڭ پىكىرىنشە، اتىستى توقتاتۋ – قاقتىعىستى رەتتەۋدىڭ باستاپقى كەزەڭى. ودان كەيىن ۋكراينا اقش پەن ەۋروپا ەلدەرىنەن قاۋىپسىزدىك كەپىلدىكتەرىن سۇراماق.
رەسەي پرەزيدەنتىنىڭ كومەكشىسى يۋري ۋشاكوۆ تا ۋكرايناداعى سوعىستى اياقتاۋ پەرسپەكتيۆاسىنا قاتىستى پىكىر ءبىلدىردى. ونىڭ ايتۋىنشا، قاقتىعىستىڭ اياقتالۋى قانشالىقتى جاقىن ەكەنىن ناقتى ايتۋ قيىن، الايدا جاعداي وسى باعىتتا ءوربىپ كەلەدى.
بۇل مالىمدەمە رەسەي پرەزيدەنتى ۆلاديمير پۋتين مەن اقش پرەزيدەنتىنىڭ ارنايى وكىلى ستيۆ ۋيتكوففتىڭ سانكت-پەتەربۋرگتە وتكەن كەزدەسۋىنەن كەيىن جاسالدى.
ۋشاكوۆتىڭ حابارلاۋىنشا، رەسەي قاراشانىڭ ورتاسىندا ۋكراينا جانە اقش-پەن ۇشجاقتى كەلىسسوزدەردى قايتا باستاۋعا دايىن ەكەنىن بىلدىرگەن. كەلىسسوزدەر وتەتىن ىقتيمال ورىنداردىڭ ءبىرى رەتىندە ابۋ-دابي قاراستىرىلىپ جاتىر.
ايتا كەتەيىك، بۇعان دەيىن ومبىداعى وقشاۋ وتىرىستا پرەزيدەنت توقاەۆ رەسەي-ۋكراينا قاقتىعىسىن ۋاقىتشا توقتاتۋعا شاقىرعان ەدى.
