الماتىدا كوپ ايەل الۋدى ناسيحاتتاعان جاريالانىمدارى ءۇشىن قازاقستاندىق بلوگەر باۋىرجان باقىتجانۇلى جاۋاپقا تارتىلدى، دەپ حابارلايدى «ادىرنا» ءتىلشىسى.
بىرنەشە كۇن بۇرىن ول Instagram پاراقشاسىندا ءوزىنىڭ ءۇش ايەلى بار ەكەنىن ايتقان ەدى.
«ولار – مەنىڭ ءومىرىمنىڭ ءسانى عانا ەمەس، ءومىرىمنىڭ تىنىشتىعى. ارقايسىنىڭ مىنەزى، ارمانى، ۋايىمى ءارتۇرلى. مەن ءمىنسىز كۇيەۋ ەمەسپىن، بىراق كۇن سايىن ولاردىڭ ءوزىن سۇيىكتى سەزىنۋى ءۇشىن بارىمدى سالامىن»، – دەدى بلوگەر.
الماتى قالالىق پوليتسيا دەپارتامەنتىنىڭ ءباسپاسوز قىزمەتى بۇل جاريالانىمدار ينتەرنەت كەڭىستىگىن مونيتورينگتەۋ بارىسىندا انىقتالعانىن مالىمدەدى.
«اۆتوردىڭ جەكە باسى انىقتالدى. وعان قاتىستى قۇقىققا قايشى كونتەنت ورنالاستىرعانى ءۇشىن قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 456-2-بابىنىڭ 3-1-بولىگى بويىنشا اكىمشىلىك حاتتاما تولتىرىلدى. پروفيلاكتيكالىق اڭگىمە جۇرگىزىلگەننەن كەيىن ازامات الەۋمەتتىك جەلىدەگى پاراقشاسىنان جاريالانعان ماتەريالداردى ءوز ەركىمەن الىپ تاستادى»، – دەلىنگەن حابارلامادا.
