قۇرىلتاي دەپۋتاتتىعىنا كانديداتتاردىڭ پارتيالىق تىزىمدەرىن تىركەۋ كەزەڭى اياقتالدى. اتالعان كەزەڭنىڭ قورىتىندىسى ورتالىق سايلاۋ كوميسسياسىنىڭ وتىرىسىندا جاريا ەتىلدى.
كوميسسيا حاتشىسى شاۆحات وتەمىسوۆ وسك تاراپىنان بارلىق جەتى ساياسي پارتيا ۇسىنعان تىزىمدەر تىركەلگەندىگىن اتاپ ءوتتى.
«2026 جىلعى 23 شىلدەدەگى جاعداي بويىنشا، قۇرىلتاي دەپۋتاتتارىنىڭ مانداتتارىنا ۇمىتكەر 7 ساياسي پارتيانىڭ تىزىمدەرىنە 545 كانديدات ەنگىزىلدى. دەپۋتاتتىق مانداتتاردىڭ جالپى سانى - 145. ايەلدەر، جاستار جانە مۇگەدەكتىگى بار ادامداردىڭ وكىلدىگىنە قويىلاتىن تالاپتاردى بارلىق ساياسي پارتيالار ساقتادى. جالپى پارتيالىق تىزىمدەر بويىنشا اتالعان ساناتتاردىڭ جيىنتىق ۇلەسى 43,9%-دى قۇرايدى. ونىڭ ىشىندە 172 - ايەلدەر، 373 - ەرلەر. مۇگەدەكتىگى بار ادامدار - 19 ادام. 35 جاسقا دەيىنگى 74 كانديدات بار. ورتاشا جاس - 45,4 جاس»، - دەپ حابارلادى وسك حاتشىسى.
شاۆحات وتەمىسوۆ سونداي-اق سايلاۋ پروتسەسىنە قاتىسۋشىلارعا زاڭناما نورمالارىن اتاپ ءوتىپ، ونىڭ ىشىندە وسك پارتيالىق ءتىزىمدى تىركەۋ تۋرالى شەشىمدى جويۋعا، سونداي-اق پارتيالىق تىزىمگە ەنگىزىلگەن تۇلعانى تىزىمنەن شىعارۋ تۋرالى شەشىم قابىلداۋعا قۇقىلى ەكەندىگىنە توقتالدى.
