ۇلتتىق بانكتىڭ اقشا-نەسيە ساياساتى كوميتەتى كەزەكتى شەشىمىن شىعارىپ، بازالىق مولشەرلەمەنى 0,25 پايىزدىق تارماققا، 16,75%-عا دەيىن تومەندەتتى، دەپ حابارلايدى "ادىرنا".
ۇلتتىق بانك مالىمەتىنشە، وعان جىلدىق ينفلياتسيانىڭ توعىز اي بويى تومەندەۋى سەبەپ بولعان. ماۋسىم ايىندا جىلدىق ينفلياتسيا 10,3% دەڭگەيىندە تۇراقتاعان. ال ازىق-تۇلىك ينفلياتسياسى 10,7%-دان 10,4%-عا دەيىن تومەندەدى.
ازىق-تۇلىككە جاتپايتىن ينفلياتسيا 11,7% دەڭگەيىندە ساقتالدى. رەتتەلەتىن كوممۋنالدىق قىزمەتتەر باعاسىنىڭ جىلدىق تومەندەۋى كەزىندە رەتتەلمەيتىن قىزمەتتەردىڭ قىمباتتاۋى اياسىندا قىزمەتتەر ينفلياتسياسى 9,0% (مامىردا – 8,7%) كورسەتتى.
باس بانك قابىلدانعان شەشىم جىلدىق ينفلياتسيانىڭ تومەندەۋ ءۇردىسىن ەسكەرىپ، اقشا-كرەديت شارتتارىن سوعان ساي تۇزەتۋگە مۇمكىندىك بەرەتىنىن اتاپ وتەدى.
«كەلەسى شەشىمدەردى قابىلداۋ ءۇشىن اعىمداعى ينفلياتسيا ديناميكاسىنىڭ ورنىقتىلىعى، رەتتەلەتىن تاريفتەردى يندەكستەۋ پارامەترلەرى، سىرتقى وتىن جانە تاۋارلار نارىعىنداعى احۋالدىڭ دامۋى تۋرالى دەرەكتەردى جيناقتاۋ قاجەت. ۇستامدى قاتاڭ اقشا كرەديت شارتتارىن دايەكتى تۇردە ساقتاۋ ينفلياتسيانىڭ ودان ءارى تومەندەۋىنە جانە ورتامەرزىمدى پەرسپەكتيۆادا ماقساتتى 5%-عا ورالۋىنا ىقپال ەتەدى»، – دەلىنگەن باس بانك حابارلاماسىندا.
بۇل رەتتە باس بانك ينفلياتسياعا اسەر ەتەتىن فاكتورلاردى قىسىم ءالى دە جوعارى ەكەنىن اتاپ وتەدى. ولاردىڭ قاتارىندا قۇبىلمالى ينفلياتسيالىق بولجامدار، جانار-جاعارماي باعاسى مەن تۇرعىن ءۇي-كوممۋنالدىق قىزمەتتەر ءتاريفىنىڭ ءوسۋى، تۇتىنۋشىلىق بەلسەندىلىكتىڭ ىقتيمال كۇشەيۋى، سونداي-اق سىرتقى نارىقتا مۇناي باعاسىڭ قىمباتتاۋى، ازىق-تۇلىكتىڭ قىمباتتاۋى بار.
بازالىق مولشەرلەمەنى 2025 جىلدىڭ قازانىنا دەيىن 18 پايىز دەڭگەيىندە ۇستاعان باس بانك ماۋسىم ايىنداعى شەشىمىندە نەگىزگى كورسەتكىشتى بىردەن 17 پايىزعا دەيىن تومەندەتكەن.
