قازاقستاندىق ساياحاتشى بلوگەر ادىلەت راحمەتوللا سولتۇستىك پوليۋسكە جاساعان ەكسپەديتسياسى تۋرالى ايتىپ، "ادىرنا" پورتالىمەن ەرەكشە اسەرىن ءبولىستى.
ونىڭ ايتۋىنشا، سولتۇستىك پوليۋسكە جەتۋ – كوپتەن بەرگى ارمانى بولعان.
«اتومدىق مۇزجارعىش كەمەگە وتىرعان ساتتە عانا بۇل ساپاردىڭ شىندىققا اينالعانىن سەزىندىم. كەمە سولتۇستىك مۇزدى مۇحيتىنىڭ قالىڭ مۇزىن جارىپ، ءدال 90 گرادۋس ەندىككە قاراي بەت الدى. سول ساتتەگى ەموتسيامدى سوزبەن جەتكىزۋ قيىن. ماقساتىما جەتكەنىمدى تۇسىنگەندە ەرەكشە قۋانىشقا بولەندىم»، – دەدى ساياحاتشى.
ادىلەت راحمەتوللا سولتۇستىك ءپوليۋستى كوزبەن عانا ەمەس، جۇرەكپەن سەزىنەتىن ەرەكشە مەكەن دەپ سيپاتتادى.
ء«دال سولتۇستىك پوليۋستە تۇرعان كەزدە قاي جاققا قاراساڭ دا – وڭتۇستىك. بۇل – ەرەكشە سەزىم. سول جەردەن گرەنلانديا، كانادا، الياسكا، شپيتسبەرگەن مەن نورۆەگيا باعىتتارىن ەلەستەتىپ، الەمنىڭ ءدال توبەسىندە تۇرعانىڭدى سەزىنەسىڭ»، – دەدى ول.
ساياحاتشى تابيعاتتاعى وزگەرىستەرگە دە نازار اۋداردى.
«بىلتىر مۇزدىڭ قالىڭدىعى ەكى مەتردەن اسسا، بيىل شامامەن 1,7 مەتر بولدى. بۇل – كليماتتىق وزگەرىستەردىڭ ايقىن كورىنىسى»، – دەدى ادىلەت راحمەتوللا.
ەكسپەديتسيا شىلدە ايىندا وتكەندىكتەن، ساياحاتشىلار پوليارلىق كۇن قۇبىلىسىن كورگەن. بۇل كەزەڭدە كۇن باتپايدى، ال اۋا تەمپەراتۋراسى شامامەن –5 گرادۋس بولعان.
ادىلەت راحمەتوللا سولتۇستىك پوليۋسكە دەيىنگى بارىپ-قايتۋ ساپارى 11 كۇنگە سوزىلعانىن ايتتى. وسى ساپار اياسىندا بلوگەر قازاقستان تۋىن سولتۇستىك پوليۋستە جەلبىرەتۋ ارمانىن ورىنداعانىن ايتتى.
ەرەكشە ءسات الەمدەگى ەڭ ءىرى اتوم مۇزجارعىش كەمەلەرىنىڭ ءبىرى - «50 لەت پوبەدى» كەمەسىنىڭ جانىندا بەينەتاسپاعا تۇسىرىلگەن.
«جەردىڭ ەڭ ۇستىڭگى نۇكتەسىندە كوك تۋىمىزدى جەلبىرەتۋ - مەن ءۇشىن ۇلكەن ماقتانىش. قازاقتىڭ تۋى الەمنىڭ ءار تۇكپىرىندە جەلبىرەي بەرسىن. ەلىمىز امان، جۇرتىمىز تىنىش بولسىن!" - دەدى ساياحاتشى-بلوگەر.
تولىعىراق "ادىرنا" ۇلتتىق پورتالىنىڭ ينستا پاراقشاسىنان وقي وتىرىڭىز.
