بيىل قوياندى جارمەڭكەسىندە پەتيتسيا قابىلدانعانىنا 121 جىل تولىپ وتىر، دەپ حابارلايدى “ادىرنا” ۇلتتىق پورتالى.
1905 جىلعى 25 شىلدەدە قارقارالى ماڭىنداعى ايگىلى قوياندى جارمەڭكەسىندە جينالعان مىڭداعان قازاق پاتشا ۇكىمەتىنىڭ وتارلىق ساياساتىنا قارسى العاش رەت ساياسي تالاپتار قويىلعان پەتيتسيانى قابىلدادى. بۇل قۇجات رەسەي يمپەرياسىنىڭ بيلىگىنە جولدانعان قازاق حالقىنىڭ تۇڭعىش ماڭىزدى ساياسي ۇندەۋى رەتىندە تاريحتا قالدى.
پەتيتسيادا قازاق جەرىندەگى وتارلىق باسقارۋ جۇيەسىن وزگەرتۋ، اكىمشىلىك رەفورمالار جۇرگىزۋ، ازاماتتىق جانە سوت ىستەرىن قازاق تىلىندە قاراۋدى زاڭداستىرۋ، وتارلىق باسقارۋ اپپاراتىنداعى شەنەۋنىكتەر سانىن قىسقارتۋ، مەملەكەتتىك دۋما مەن جوعارعى بيلىك ورگاندارىنا قازاق وكىلدەرىنىڭ سايلانۋىن قامتاماسىز ەتۋ سەكىلدى تالاپتار كوتەرىلدى.
قۇجات تەك رەسەي پاتشاسىنىڭ اتىنا عانا ەمەس، «سىن وتەچەستۆا» مەن «رۋسسكيە ۆەدوموستي» سياقتى رەسەيلىك باسىلىمداردىڭ رەداكتسيالارىنا دا جولدانىپ، قازاق حالقىنىڭ تالاپ-تىلەگىن يمپەريانىڭ ورتالىعىنا جەتكىزۋ كوزدەلدى.
تاريحي باستامانى سول كەزەڭدەگى بىرنەشە بولىستىڭ بەدەلدى ازاماتتارى كوتەردى. ولاردىڭ قاتارىندا ابىرالى بولىسىنان مۇسا قۇلباەۆ پەن سۇلەيمەن قويسويماسوۆ، اقبوتا بولىسىنان ءجۇسىپ قۇلباتىروۆ پەن بەكتىباي بوتاباەۆ، ءبورىلى بولىسىنان تولمۇحامەت التىنتورين مەن راقيا ساتپاەۆ، دەگەلەڭ بولىسىنان كەرىمحان تولەباەۆ پەن تىشقانباي قاشاقوۆ، تەمىرشى بولىسىنان سەكەرباي قانعوجين مەن وسپان جانعابىلوۆ بولدى. مىڭداعان ادام وسى پەتيتسياعا قول قويىپ، قازاق حالقىنىڭ ساياسي قۇقىعى مەن ۇلتتىق مۇددەسىن قورعاۋعا ءۇن قوستى.
