حالىقارالىق عىلىمي جۋرنالدارعا ماقالا جاريالاۋدا ەستە ساقتايتىن جايتتار

5921
Adyrna.kz Telegram
behance.net
behance.net

سكوپۋس، تومسون رەيتەرس جانە ت،ب، حالىقارالىق عىلىمي بازاسىنا ەنەتىن جۋرنالدارعا ماقالا جاريالاۋدا ەستە ساقتايتىن جاعدايلار (گۋمانيتارلىق سالالار ءۇشىن):

1. تاقىرىبىڭىز بارىنشا جيناقى، تۇسىنىكتى بولۋى ءتيىس;
2. ماقالادا نەنى زەرتتەدىڭىز، قانداي زەرتتەۋ ءادىسىن باسشىلىققا الدىڭىز، ءون بويى كورىنىپ تۇرۋى كەرەك;
3. سويلەمدەر عىلىمي ستيلگە قۇرىلۋى ءتيىس (قازاق تىلىندەگى عىلىمي ستيل قۇرىلىمى مەن اتالعان بازاعا ەنەتىن جۋرنالداردىڭ عىلىمي ءستيلى ءار ءتۇرلى);
4. ءبىر ماقالانى ءبىر ۋاقىتتا بىرنەشە جۋرنالعا قاتار جىبەرۋگە بولمايدى. ماقالاڭىزدى ءبىر جۋرنالعا جىبەرگەن ەكەنسىز، جاۋابىن كۇتىڭىز، بۇل شامامەن 3-4, كەيدە ءتىپتى 6 اي مەرزىمدى قامتيدى. دەسەك تە، ماقالانىڭ جاريالانۋى تۋرالى شامامەن 1,5-2 ايدا ء"يا", "جوق" دەگەن جاۋاپ كەلىپ قالادى;
5. جۋرنالدىڭ قانداي ستيلمەن قابىلدايتىنىن دا ويدان شىعارماۋعا ءتيىسسىز. (مىسالى، ارا ت.ب.). رەداكتسيا تالابىنا ساي، كورسەتىلگەن ستيلمەن راسىمدەپ جىبەرسەڭىز، بۇل ءسىزدىڭ ماقالاڭىز تۋرالى جاعىمسىز اسەر قالدىرماسى انىق;
6. مىسالى، تاريح، ءتىل، ادەبيەت، فيلوسوفيا سالالارىندا ماقالاڭىزدى الەمدىك تاجىريبەمەن، مادەنيەت، ادەبيەتپەن، عىلىمي تەوريالارمەن ءۇشتاستىرا زەرتتەسەڭىز، بۇل سالاداعى ءتول عىلىمي زەرتتەۋىڭىز تۋرالى تۇسىنىكتى دۇرىس قالىپتاستىراسىز;
7. حات جازۋ. ماقالاڭىزدى جۋرنالدىڭ ارنايى سايتىنا تىركەگەننەن كەيىن، ەگەر قوسىمشا حات جىبەرسەڭىز، بۇل ءسىزدىڭ زەرتتەۋشى رەتىندە وزىندىك پايىمىڭىزدىڭ دەڭگەيىن كورسەتەدى;
8. الەمدىك ونلاين عىلىمي پلاتفورمالاردان ءوزىڭىزدىڭ زەرتتەۋ تاقىرىبىڭىزعا بايلانىستى ماقالالار تۋرالى پىكىر جازىپ ۇيرەنىڭىز. بۇل "كەرەمەت ماقالا", "ماعان ۇنادى", "اۆتورعا رەسپەكت" دەگەن سوزدەردەن تۇرمايدى. ۇناسا نەگە ۇنادى، نە سەبەپتەن مۇنداي پىكىرگە كەلىپ وتىرسىز، ءبارىن تارقاتىپ اشىپ، جازۋىڭىز كەرەك;
9. جۋرنالدى تاڭداپ الۋىڭىز قاجەت بولادى. ءسىزدىڭ ماقالاڭىزدىڭ دەڭگەيى قانداي؟ ءوزىڭىز باعا بەرىپ ۇيرەنۋىڭىز كەرەك. جۋرنال ءسىزدىڭ ماقالاڭىزدىڭ تاقىرىبىنا ساي كەلە مە، عىلىمي مەتريكالارى كوڭىلىڭىزدەن شىعا ما، جانە ول تالاپتارعا ءسىزدىڭ ماقالاڭىز ساي ما؟ كۆارتيلى قانشا ەكەن دەپ سۇرايتىنىمىز بار، بىراق ونىڭ تالاپتارى قانداي ەكەن دەگەن ساۋال ىشىمىزدە قالىپ كەتەدى;
10. مىسالى، ءتىل تەورياسى مەن ادەبيەت تەورياسىندا وتاندىق ءبىلىم مازمۇنىن تەرەڭ مەڭگەرگەنىڭىز ازدىق ەتەدى. ءسىز ءوزىڭىز جازعان تاقىرىپتا باسقا ەلدەردەگى عالىمداردان كىمدەر زەرتتەدى؟ قانداي تۇجىرىمدارى بار... كەم دەگەندە ىرگەلى زەرتتەۋلەر اۆتورلارىنان 10-15 ادامنىڭ ەڭبەگىن وقىپ، ءبىلۋىڭىز كەرەك ءبىر ماقالانى دايىنداۋ ءۇشىن;
11. قازاق ءتىلى، قازاق ادەبيەتى، قازاقستان تاريحى، قازاق مادەنيەتى، قازاق ەتنوگرافياسى تەك قازاققا كەرەك. جاريالاۋ قيىن. ءيا، قيىنى - قيىن. بىراق ءتىلدىڭ تەورياسى مەن ادەبيەتتىڭ تەورياسى ادامزاتقا ورتاق. تاريحتىڭ داۋىرلەرى مەن كەزەڭدەرى كلاسسيفيكاتسياسى ۇقساس. مادەنيەت تە سولاي. سول ءۇشىن تەوريالىق جاعىنان مالىمەتتەر قامتىلۋىن قاداعالاۋىڭىز كەرەك;
12. جۋرنالدار قولجەتىمدى، قولجەتىمسىز بولىپ بولىنەدى. جاريالانۋ جارناسى جاعىنان دا سولاي. بىراق سالماقتى جۋرنالداردىڭ دا تەگىنى بار. مەتريكالىق جاعىنان بۇل جارنالاردى بەلگىلى ءبىر مولشەرمەن ايتۋ عىلىمي ەتيكاعا جات;
13.عىلىمي تۇجىرىمىڭىزبەن قاتار بولجامىڭىز دا بولۋى ءتيىس. ماقالا جىبەرسەڭىز، سول جۋرنالدىڭ سايتىن باقىلاپ وتىرىڭىز. مىسالى، ءبىر عانا عىلىمي كىتاپحانالار پلاتفورماسىنا ەنەتىن تومەندەگى جۋرنالدار تاريحى وتە تاماشا. مەنىڭ نىساناعا العانىم - ەكەۋى. مۇمكىن تاعى دا بار شىعار جۋرنالدار بۇل پلاتفورماداعى. سايتىن بايقاپ وتىرساق، جاريالانعان ماقالالار سانى شەكتەن تىس كوپ. ءبىرى بيىل سكوپۋستاعى ۋاقىتىن توقتاتتى. ەكىنشى جۋرنال سكوپۋستا تۇر. فيلوسوفيالىق جاعىنان كۆارتيلى - 2. وسىدان 3 اي بۇرىن ءوزىم دە ماقالا جىبەردىم. تەگىن. ەندى جۋرنالدا جاريالانىپ جاتقان ماقالالار ساپاسىنا (تىلدىك، مازمۇندىق) قاراپ وتىرىپ، بولجام جاساپ وتىرمىن. بۇل جۋرنال وسى قارقىنمەن كەتە بەرسە، كەلەسى جىلى مەتريكالىق ءارى بازالىق وزگەرىستەرى بولادى;
14. عىلىمي ماقالانى ءوزىڭىز اۋدارىڭىز. ءسىزدىڭ زەرتتەۋ ماقساتىڭىزدى سىزدەن باسقا ەشكىم بىلمەيدى. نەمەسە اۋدارماشىنىڭ جانىندا وتىرىپ، ءاربىر سويلەمگە ءمان بەرىڭىز. قانشالىقتى ساپالى جازىلعان ماقالا بولسا دا، اۋدارىلۋى جاعىنان كەمشىلىكتەر بولسا، وندا بۇل ماقالاڭىزدىڭ جاريالانۋىنا كەرى اسەرىن تيگىزەدى;
15. ماقالانى باسقا اۆتورلارمەن بىرىگىپ جازساڭىز، وي بىرلىگى ۇلكەن رول وينايدى.

بۇل - باسى عانا. ويىمىزدى جالپى ورتاعا سالىپ وتىرمىز. الىپ-قوسار بارلىق كەز-كەلگەن پىكىرلەرگە زور قۇرمەتپەن قارايمىن!
دەسەك تە، بۇگىنگى عىلىمي زەرتتەۋلەرىمىزدىڭ كەشەگى زەرتتەۋلەردىڭ جالعاسى ەكەنىن ۇمىتپاۋىمىز كەرەك. اعا بۋىننىڭ ەڭبەكتەرىن شاشاۋ شىعارماي كەلەشەككە جەتكىزۋ - پارىزىمىز.

اراي جۇندىباەۆا،
فيلوسوفيا (PhD) دوكتورى،
لينگۆيست، ادەبيەت زەرتتەۋشىسى
پىكىرلەر