Biyl Qoiandy järmeŋkesınde petisiia qabyldanǧanyna 121 jyl tolyp otyr, dep habarlaidy “Adyrna” ūlttyq portaly.
1905 jylǧy 25 şıldede Qarqaraly maŋyndaǧy äigılı Qoiandy järmeŋkesınde jinalǧan myŋdaǧan qazaq patşa ükımetınıŋ otarlyq saiasatyna qarsy alǧaş ret saiasi talaptar qoiylǧan petisiiany qabyldady. Būl qūjat Resei imperiiasynyŋ bilıgıne joldanǧan qazaq halqynyŋ tūŋǧyş maŋyzdy saiasi ündeuı retınde tarihta qaldy.
Petisiiada qazaq jerındegı otarlyq basqaru jüiesın özgertu, äkımşılık reformalar jürgızu, azamattyq jäne sot ısterın qazaq tılınde qaraudy zaŋdastyru, otarlyq basqaru apparatyndaǧy şeneunıkter sanyn qysqartu, Memlekettık Duma men joǧarǧy bilık organdaryna qazaq ökılderınıŋ sailanuyn qamtamasyz etu sekıldı talaptar köterıldı.
Qūjat tek Resei patşasynyŋ atyna ǧana emes, «Syn Otechestva» men «Russkie vedomosti» siiaqty reseilık basylymdardyŋ redaksiialaryna da joldanyp, qazaq halqynyŋ talap-tılegın imperiianyŋ ortalyǧyna jetkızu közdeldı.
Tarihi bastamany sol kezeŋdegı bırneşe bolystyŋ bedeldı azamattary köterdı. Olardyŋ qatarynda Abyraly bolysynan Mūsa Qūlbaev pen Süleimen Qoisoimasov, Aqbota bolysynan Jüsıp Qūlbatyrov pen Bektıbai Botabaev, Börılı bolysynan Tolmūhamet Altyntorin men Raqiia Satpaev, Degeleŋ bolysynan Kerımhan Tölebaev pen Tyşqanbai Qaşaqov, Temırşı bolysynan Sekerbai Qanǧojin men Ospan Janǧabylov boldy. Myŋdaǧan adam osy petisiiaǧa qol qoiyp, qazaq halqynyŋ saiasi qūqyǧy men ūlttyq müddesın qorǧauǧa ün qosty.
