رەسپۋبليكالىق وقيعالار مەن ءىس-شارالار كۇنتىزبەسىنە جەتىسۋ وبلىسى تاراپىنان ەنگىزىلگەن «الاكول تولقىنى» مادەني-تۋريستىك فەستيۆالى جەتىسۋ وبلىسى، الاكول اۋدانى، اقشي اۋىلىنداعى الاكول كولىنىڭ جاعالاۋىندا ءتيىستى دەڭگەيدە ۇيىمداستىرىلىپ، ءوز مارەسىنە جەتتى.
«الاكول تولقىنى» فەستيۆالىنە قىتاي، رەسەي، بەلارۋس، وزبەكستان جانە قىرعىزستاننان كەلگەن شەتەلدىك تۋريستەر مەن قوناقتار، سونداي-اق قازاقستاننىڭ ءار وبلىسىنان كەلگەن دەمالۋشىلار مەن ءوڭىر تۇرعىندارىن قوسا العاندا، 5 مىڭنان استام ادام قاتىستى.
فەستيۆالدىڭ سالتاناتتى اشىلۋ ءراسىمى الاكول ءوڭىرىنىڭ تۋريستىك الەۋەتىن، تابيعي ەرەكشەلىكتەرى مەن تاريحي-مادەني قۇندىلىقتارىن دارىپتەيتىن ارنايى بەينەروليكتىڭ كورسەتىلىمىمەن باستالدى.
رەسمي بولىمدە العاشقى قۇتتىقتاۋ ءسوز جەتىسۋ وبلىسى اكىمىنىڭ ورىنباسارى مارلەن كولباەۆقا بەرىلىپ، ول وڭىردە تۋريزم سالاسىن دامىتۋ، تۋريستىك ينفراقۇرىلىمدى جەتىلدىرۋ جانە الاكول جاعالاۋىن حالىقارالىق دەڭگەيدەگى تۋريستىك باعىت رەتىندە دامىتۋ باعىتىندا اتقارىلىپ جاتقان جۇمىستار تۋرالى ايتتى.
ودان كەيىن قۇتتىقتاۋ ءسوز سويلەگەن قازاقستان رەسپۋبليكاسى تۋريزم جانە سپورت ۆيتسە-ءمينيسترى ميراس تولەباەۆ الاكول ءوڭىرىنىڭ ەلىمىزدىڭ تۋريزم سالاسىنداعى ستراتەگيالىق ماڭىزىن اتاپ ءوتىپ، مۇنداي مادەني-تۋريستىك جوبالاردىڭ قازاقستاننىڭ تۋريستىك ءيميدجىن نىعايتۋداعى رولىنە توقتالدى. سونداي-اق فەستيۆالدىڭ ۇيىمداستىرۋشىلارىنا ريزاشىلىعىن ءبىلدىرىپ، قاتىسۋشىلار مەن قوناقتارعا ىزگى تىلەگىن جەتكىزدى.
رەسمي بولىمنەن كەيىن فەستيۆالدىڭ كونتسەرتتىك باعدارلاماسى باستالىپ، قازاقستان ەستراداسىنىڭ تانىمال ونەر جۇلدىزدارى Turar (تۇرار), Ayree (ايري) جانە اسەل مەكەباەۆا كورەرمەندەرگە كوتەرىڭكى كوڭىل كۇي سىيلادى. تانىمال ورىنداۋشىلاردىڭ سۇيىكتى اندەرى الاكول جاعالاۋىنا جينالعان مىڭداعان كورەرمەننىڭ ىستىق ىقىلاسىنا بولەنىپ، ەرەكشە مەرەكەلىك اتموسفەرا قالىپتاستىردى.
فەستيۆال اياسىندا قوناقتارعا ارنالعان ويىن-ساۋىق باعدارلاماسى دا ۇيىمداستىرىلدى. اتاپ ايتقاندا، حودۋليستەردىڭ اسەرلى قويىلىمدارى ۇسىنىلىپ، ءتىرى مۇسىندەر مەن الىپ ويىنشىق كەيىپكەرلەرى ونەر كورسەتتى. ولار فەستيۆال قوناقتارىمەن جارقىن جۇزدەسىپ، ەستەلىك سۋرەتتەرگە ءتۇسىپ، اسىرەسە بالالارعا ەرەكشە قۋانىش سىيلادى.
سونىمەن قاتار، كورەرمەندەردىڭ قاتىسۋىمەن ينتەراكتيۆتى ويىندار وتكىزىلىپ، بەلسەندى قاتىسۋشىلارعا ارنايى سىيلىقتار تابىستالدى. فەستيۆال اۋماعىندا ارنايى فوتوزونا جۇمىس ىستەپ، كەلۋشىلەرگە الاكول جاعالاۋىنداعى جارقىن ساتتەردى ەستەلىككە اينالدىرۋعا مۇمكىندىك بەرىلدى.
كەشتىڭ بارىسىندا كاسىبي DJ-ءدىڭ قاتىسۋىمەن زاماناۋي مۋزىكالىق باعدارلاما ۇيىمداستىرىلدى. اسەرلى دىبىستىق سۇيەمەلدەۋ، فەستيۆالدىڭ ءسانىن كەلتىرىپ، اشىق اسپان استىنداعى تۇنگى بي الاڭىندا مىڭداعان قوناقتىڭ باسىن قوستى.
فەستيۆالدىڭ شارىقتاۋ شەگى رەتىندە الاكول اسپانىن جارقىراتا كومكەرگەن اسەرلى مەرەكەلىك وتشاشۋ ۇيىمداستىرىلدى. ءتۇرلى تۇسكە بويالعان وت شاشۋلار كول جاعالاۋىنا ەرەكشە كورىك بەرىپ، فەستيۆالدىڭ جارقىن قورىتىندىسىنا اينالدى.
«الاكول تولقىنى» فەستيۆالىنىڭ باستى ماقساتى – جەتىسۋ وبلىسىنىڭ تۋريستىك الەۋەتىن كەڭىنەن تانىتۋ، الاكولدىڭ حالىقارالىق تۋريستىك باعىت رەتىندەگى بەدەلىن ارتتىرۋ، ىشكى جانە كەلۋ ءتۋريزمىن دامىتۋ، ءوڭىردىڭ مادەني ءومىرىن جانداندىرۋ جانە قازاقستاندىق ءارى شەتەلدىك تۋريستەرگە جوعارى دەڭگەيدەگى مادەني دەمالىس ۇسىنۋ بولدى.
مادەنيەت پەن ءتۋريزمدى توعىستىرعان ايتۋلى جوبا رەتىندە وتكەن «الاكول تولقىنى» فەستيۆالى ءوڭىردىڭ تۋريستىك تارتىمدىلىعىن ارتتىرۋعا، جەتىسۋ وبلىسىنىڭ وڭ ءيميدجىن قالىپتاستىرۋعا جانە الاكول جاعالاۋىن حالىقارالىق دەڭگەيدەگى تۋريستىك ورتالىق رەتىندە دارىپتەۋگە ءوز ۇلەسىن قوستى.
وبلىستىق تۋريزم باسقارماسىنىڭ مالىمەتى بويىنشا دايىندالدى.
