ەۋروپالىق وداق رەسەيگە قارسى سانكتسيالاردىڭ 21-پاكەتىن بەكىتتى. جاڭا شەكتەۋلەر تىزىمىنە قازاقستان مەن قىرعىزستانداعى بىرقاتار كومپانيا ەنگىزىلدى، دەپ حابارلايدى «ادىرنا» ءتىلشىسى TRT-عا سىلتەمە جاساپ.
بريۋسسەلدىڭ مالىمدەۋىنشە، بۇل شارالار ەو-نىڭ قولدانىستاعى سانكتسيالارىن اينالىپ ءوتۋ ءۇشىن پايدالانىلۋى مۇمكىن قارجىلىق جانە ساۋدا ارنالارىنىڭ جولىن كەسۋگە باعىتتالعان.
سانكتسيالار تىزىمىنە جالپى سانى 48 جەكە تۇلعا مەن 170 ۇيىم ەنگىزىلگەن. سونداي-اق قوسارلى ماقساتتاعى تاۋارلار مەن تەحنولوگيالارعا قاتىستى ەكسپورتتىق باقىلاۋدى كۇشەيتۋدى كوزدەيتىن ارنايى تىزىمگە تاعى 51 كومپانيا قوسىلعان. ولاردىڭ قاتارىندا قازاقستاندىق TauKZ LLP جانە KBR-Technologies LLP كومپانيالارى، سونداي-اق بىشكەكتە تىركەلگەن Nova Proekt LLC, Rama Group LLC جانە Shisan Ltd ۇيىمدارى بار.
اتالعان تىزىمگە ەنگىزىلۋ بۇل كومپانيالارعا ەۋرووداق ەلدەرىنەن سەزىمتال تاۋارلار مەن تەحنولوگيالاردى جەتكىزۋ تەك ەرەكشە جاعدايلاردا عانا مۇمكىن بولاتىنىن بىلدىرەدى. شەكتەۋلەر تەحنيكالىق جانە قارجىلىق قىزمەتتەرگە دە قولدانىلادى. الايدا بۇل شارالار كومپانيالاردىڭ اكتيۆتەرىن اۆتوماتتى تۇردە بۇعاتتاۋدى قاراستىرمايدى.
بۇدان بولەك، ەۋروپالىق وداق قىرعىزستانداعى EcoIslamicBank بانكىمەن وپەراتسيالار جۇرگىزۋگە تىيىم سالدى. ەو بۇل بانكتىڭ SWIFT جۇيەسىنە بالاما رەتىندە قۇرىلعان رەسەيدىڭ قارجىلىق حابارلامالار بەرۋ جۇيەسىمەن بايلانىسى بار ەكەنىن مالىمدەدى.
اتالعان شەكتەۋلەر 13 تامىزدان باستاپ كۇشىنە ەنبەك.
