Europalyq odaq Reseige qarsy sanksiialardyŋ 21-paketın bekıttı. Jaŋa şekteuler tızımıne Qazaqstan men Qyrǧyzstandaǧy bırqatar kompaniia engızıldı, dep habarlaidy «Adyrna» tılşısı TRT-ǧa sılteme jasap.
Briusseldıŋ mälımdeuınşe, būl şaralar EO-nyŋ qoldanystaǧy sanksiialaryn ainalyp ötu üşın paidalanyluy mümkın qarjylyq jäne sauda arnalarynyŋ jolyn kesuge baǧyttalǧan.
Sanksiialar tızımıne jalpy sany 48 jeke tūlǧa men 170 ūiym engızılgen. Sondai-aq qosarly maqsattaǧy tauarlar men tehnologiialarǧa qatysty eksporttyq baqylaudy küşeitudı közdeitın arnaiy tızımge taǧy 51 kompaniia qosylǧan. Olardyŋ qatarynda qazaqstandyq TauKZ LLP jäne KBR-Technologies LLP kompaniialary, sondai-aq Bışkekte tırkelgen Nova Proekt LLC, Rama Group LLC jäne Shisan Ltd ūiymdary bar.
Atalǧan tızımge engızılu būl kompaniialarǧa Euroodaq elderınen sezımtal tauarlar men tehnologiialardy jetkızu tek erekşe jaǧdailarda ǧana mümkın bolatynyn bıldıredı. Şekteuler tehnikalyq jäne qarjylyq qyzmetterge de qoldanylady. Alaida būl şaralar kompaniialardyŋ aktivterın avtomatty türde būǧattaudy qarastyrmaidy.
Būdan bölek, Europalyq odaq Qyrǧyzstandaǧy EcoIslamicBank bankımen operasiialar jürgızuge tyiym saldy. EO būl banktıŋ SWIFT jüiesıne balama retınde qūrylǧan Reseidıŋ Qarjylyq habarlamalar beru jüiesımen bailanysy bar ekenın mälımdedı.
Atalǧan şekteuler 13 tamyzdan bastap küşıne enbek.
