قازاقستان قۇراماسى شانحايدا وتكەن 67-ءشى حالىقارالىق ماتەماتيكالىق وليمپيادادا (IMO) 3 كۇمىس جانە 3 قولا مەدال يەلەنىپ، ەل قورجىنىنا تاعى ءبىر ءىرى جەتىستىك قوستى.
قىتايدىڭ شانحاي قالاسىندا وتكەن حالىقارالىق ماتەماتيكالىق وليمپياداعا (International Mathematical Olympiad, IMO) الەمنىڭ 117 ەلىنەن 700-گە جۋىق دارىندى وقۋشى قاتىستى. بۇل – الەمدەگى ەڭ كونە ءارى ەڭ بەدەلدى زياتكەرلىك جارىستاردىڭ ءبىرى.
قازاقستان رەسپۋبليكاسى وقۋ-اعارتۋ مينيسترلىگىنىڭ مالىمەتىنشە، ۇلتتىق قۇراما جارىستى 3 كۇمىس جانە 3 قولا مەدالمەن اياقتادى.
كۇمىس مەدالدى Almaty قالاسىنداعى Haileybury Almaty حالىقارالىق مەكتەبىنىڭ 12-سىنىپ وقۋشىسى تيمۋر مۇرات، الماتىداعى NURORDA مەكتەپ-ليتسەيىنىڭ 11-سىنىپ وقۋشىسى ءالي ەركەبۇلانۇلى جانە رەسپۋبليكالىق فيزيكا-ماتەماتيكا مەكتەبىنىڭ 10-سىنىپ وقۋشىسى باتىرحان بەيعانوۆ جەڭىپ الدى.
ال قولا جۇلدەنى الماتىداعى NURORDA مەكتەپ-ليتسەيىنىڭ 11-سىنىپ وقۋشىسى ەراسىل التىنبەك، استاناداعى Spectrum حالىقارالىق مەكتەبىنىڭ 12-سىنىپ وقۋشىسى مارعۇلان شارەل جانە Haileybury Almaty حالىقارالىق مەكتەبىنىڭ 12-سىنىپ وقۋشىسى ءامىرلان امانجولوۆ يەلەندى.
حالىقارالىق ماتەماتيكالىق وليمپيادا 1959 جىلدان بەرى وتكىزىلىپ كەلەدى جانە الەمدەگى ەڭ بەدەلدى پاندىك وليمپيادالاردىڭ ءبىرى سانالادى. قازاقستان بۇل دوداعا 1992 جىلدان بەرى تۇراقتى قاتىسىپ كەلەدى.
وسى ۋاقىت ىشىندە ۇلتتىق قۇراما وليمپياداعا 34 رەت قاتىسىپ، جالپى 16 التىن، 54 كۇمىس جانە 86 قولا مەدال، سونداي-اق 30 قۇرمەت گراموتاسىن جەڭىپ العانىن دا ايتا كەتەيىك.
