2026 جىلدىڭ العاشقى جارتىسىندا قازاقستاندا جول-كولىك وقيعالارىنان قازا تاپقاندار سانى وتكەن جىلدىڭ سايكەس كەزەڭىمەن سالىستىرعاندا 15,5 پايىزعا تومەندەگەنى تۋرالى اقپارات تارادى، دەپ حابارلايدى "ادىرنا" ۇلتتىق پورتالى.
بۇل تۋرالى باس پروكۋراتۋرا حابارلادى.
ۆەدومستۆونىڭ مالىمەتىنشە، التى اي ىشىندە جول-كولىك وقيعالارىنان زارداپ شەككەندەر سانى 22 346-دان 21 007 ادامعا دەيىن ازايعان. ال قازا بولعاندار سانى 955-تەن 807 ادامعا تومەندەگەن. باس پروكۋراتۋرا مۇنداي ناتيجەگە جول قاۋىپسىزدىگىن كۇشەيتۋگە باعىتتالعان كەشەندى شارالاردىڭ ارقاسىندا قول جەتكىزىلگەنىن اتاپ ءوتتى. اتاپ ايتقاندا، ورتاشا جىلدامدىقتى باقىلاۋ جۇيەسى ەنگىزىلىپ، جۇرگىزۋشىلەردى دايارلايتىن وقۋ ۇيىمدارىن ليتسەنزيالاۋ قايتا جانداندىرىلدى. سونىمەن قاتار موپەدتەردى مىندەتتى تىركەۋ قولعا الىنىپ، جول قوزعالىسى ەرەجەلەرىن بۇزۋدى اۆتوماتتى تۇردە تىركەۋ جۇيەسى كەڭەيتىلدى.
جىل باسىنان بەرى ەلىمىزدە 15 188 جول-كولىك وقيعاسى تىركەلگەن. ولاردىڭ باسىم بولىگى جول قوزعالىسى ەرەجەلەرىن قاساقانا ءارى جۇيەلى تۇردە بۇزاتىن جۇرگىزۋشىلەردىڭ قاتىسۋىمەن بولعان. پروكۋراتۋرانىڭ مالىمەتىنشە، جاياۋ جۇرگىنشىلەر وتكەلدەرىندە بولعان جول اپاتتارىنان 5 971 ادام جاراقات الىپ، 208 ادام، ونىڭ ىشىندە 40 بالا كوز جۇمعان. ماس كۇيىندە كولىك باسقارعان جۇرگىزۋشىلەردىڭ كىناسىنەن 209 ادام زارداپ شەگىپ، 8 ادام قازا تاپقان.
ەڭ كوپ ادام شىعىنى جىلدامدىقتى شامادان تىس اسىرۋ مەن قاۋىپتى مانەۆر جاساۋدىڭ سالدارىنان تىركەلگەن. وسى ەكى سەبەپ بويىنشا 8 مىڭنان استام ادام جاراقات الىپ، 676 ادام كوز جۇمعان.
ۆەدومستۆو جول بۇزاقىلىعىنا قاتىستى جاۋاپكەرشىلىكتى كۇشەيتۋ جۇمىستارى جالعاسىپ جاتقانىن مالىمدەدى. بيىل اكىمشىلىك قۇقىق بۇزۋشىلىق تۋرالى كودەكستىڭ 434-بابى بويىنشا 29 جۇرگىزۋشى اكىمشىلىك قاماۋعا الىنعان.
سونداي-اق 25 تامىزدان باستاپ 65 جاستان اسقان جانە مۇگەدەكتىگى بار جۇرگىزۋشىلەردىڭ مەديتسينالىق تەكسەرۋدەن وتۋىنە باقىلاۋ كۇشەيتىلەدى. ەگەر مەملەكەتتىك جۇيەدە جۇرگىزۋشىنىڭ مەديتسينالىق تەكسەرۋدەن وتكەنى تۋرالى مالىمەت بولماسا، ونىڭ جۇرگىزۋشى كۋالىگىنىڭ قولدانىسى ۋاقىتشا توقتاتىلادى.
