ۋكراينانىڭ سىرتقى ىستەر ءمينيسترىنىڭ مىندەتىن ۋاقىتشا اتقارۋشى اندرەي سيبيگا يراننىڭ سىرتقى ىستەر ءمينيسترى ابباس اراكچيمەن تەلەفون ارقىلى سويلەسكەنىن ايتتى. بۇل تۋرالى ول 28 شىلدە كۇنى كەشكە X الەۋمەتتىك جەلىسىندە جازدى، دەپ حابارلايدى «ادىرنا» ءتىلشىسى.
سيبينا كيەۆتىڭ «قاجەتسىز شيەلەنىستى بولدىرماۋعا» مۇددەلى ەكەنىن ايتقان. ءۇش كۇن بۇرىن تەگەران ۋكراينانى كاسپي تەڭىزىندەگى يراندىق ساۋدا كەمەسىنە شابۋىل جاسادى دەپ ايىپتاعان ەدى. اتالعان وقيعا سالدارىنان ءبىر تەڭىزشى قازا تاپقان.
ءمينيستردىڭ ايتۋىنشا، ۋكراينا ارەكەتتەرى «ەشقاشان ازاماتتىق كەمەلەر مەن بەيبىت تۇرعىندارعا قارسى باعىتتالماعان». ول رەسەيدىڭ اگرەسسياسى وسىنداي وقيعالاردىڭ تۇپكى سەبەبى ەكەنىن ايتىپ، بارلىق ارانداتۋ مەن ادام شىعىنى ءۇشىن جاۋاپكەرشىلىك ماسكەۋگە جۇكتەلەتىنىن مالىمدەدى.
«مەن شيەلەنىستى ۋشىقتىرۋى مۇمكىن كەز كەلگەن ارەكەتتەن باس تارتۋدىڭ ماڭىزىن اتاپ ءوتتىم. بۇل سوعىس زاڭسىز جانە ول اياقتالۋى ءتيىس. ءبىزدىڭ ۇستانىمىمىز وزگەرمەيدى. ەۋروپا مەن تاياۋ شىعىس تۇراقتىلىققا، قاۋىپسىزدىككە جانە بەيبىتشىلىككە لايىق»، – دەدى اندرەي سيبيگا.
كوپ ۇزاماي ابباس اراكچي X جەلىسىندە جاۋاپ جاريالاپ، سيبيگانىڭ يراندىق كەمەگە جاسالعان شابۋىلدىڭ قاساقانا بولماعانىن جانە ۋكراينانىڭ شيەلەنىستى ۋشىقتىرۋدى كوزدەمەيتىنىن جەتكىزگەنىن جازدى.
«يران دا شيەلەنىسكە ۇمتىلمايدى. الايدا ءبىزدىڭ ازاماتتارىمىزعا نەمەسە ۇلتتىق مۇددەلەرىمىزگە قارسى كەز كەلگەن شابۋىلدىڭ قابىلدانبايتىنىن ناقتى مالىمدەدىك. كەلتىرىلگەن شىعىن وتەلۋى ءتيىس»، – دەدى اراكچي.
25 شىلدەدە يران ۋكرايناعا كاسپي تەڭىزىندەگى ءوزىنىڭ ساۋدا كەمەسىنە شابۋىل جاسادى دەگەن ايىپ تاققان بولاتىن. يران ءسىم مالىمەتىنشە، وقيعا سالدارىنان كەمەدە جارىلىس بولىپ، ەكيپاج مۇشەلەرىنىڭ ءبىرى قازا تاۋىپ، تاعى ءبىرى جارالانعان.
ۆەدومستۆو بۇل ارەكەتتى بۇۇ جارعىسىن بۇزۋ دەپ باعالاپ، يراننىڭ رەسەيدىڭ ۋكرايناعا قارسى سوعىسىنا «ەشقاشان ارالاسپاعانىن» مالىمدەدى. سونىمەن قاتار تەگەران كيەۆتىڭ ارەكەتتەرى «سوعىس پەن تۇراقسىزدىق اۋقىمىن كەڭەيتۋگە باعىتتالعان» دەپ ايىپتادى.
