اقش پرەزيدەنتى دونالد ترامپ پەن ۋكراينا پرەزيدەنتى ۆلاديمير زەلەنسكيدىڭ اق ۇيدەگى كەزدەسۋى شامامەن ءبىر ساعاتقا سوزىلدى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
بۇل سوڭعى ەكى ايداعى ەكى پرەزيدەنتتىڭ ءۇشىنشى جەكە كەزدەسۋى بولدى. كەزدەسۋ جابىق فورماتتا، بۇقارالىق اقپارات قۇرالدارىنىڭ قاتىسۋىنسىز وتكەن.
زەلەنسكي ترامپپەن وتكەن اڭگىمەنى جاقسى باعالادى.
«سوپاق كابينەتتە پرەزيدەنت ترامپپەن جاقسى كەزدەسۋ ءوتتى. ۋكراينالىقتاردىڭ ءومىرىن قورعاۋ جانە بەيبىتشىلىككە قول جەتكىزۋ جولىندا بىرلەسىپ اتقارىپ جاتقان جۇمىستارىمىز ءۇشىن العىس ايتامىن»، – دەپ جازدى ول اق ۇيدەن شىققاننان كەيىن الەۋمەتتىك جەلىدە.
كەيىنىرەك اق ءۇيدىڭ ءباسپاسوز حاتشىسى كەرولاين لەۆيتت ترامپتىڭ زەلەنسكيمەن جانە يزرايل پرەمەر-ءمينيسترى بينيامين نەتانياحۋمەن (ول ۋكراينا پرەزيدەنتىنەن كەيىن بىردەن اق ۇيگە كەلگەن – رەد.) كەزدەسۋلەرىن «وڭ ءارى ناتيجەلى» دەپ سيپاتتادى. ال ترامپتىڭ ءوزى بۇل كەزدەسۋلەر تۋرالى ازىرگە پىكىر بىلدىرگەن جوق.
زەلەنسكيدىڭ ايتۋىنشا، تاراپتار Patriot كەشەندەرىنە ارنالعان توسقاۋىلداۋشى زىمىرانداردى ءوندىرۋ ليتسەنزيالارىن جانە «كومەك بەرە الاتىن باسقا دا يدەيالاردى» تالقىلاعان. الايدا ول ناقتى قانداي باستامالار ءسوز بولعانىن اشىپ ايتپادى.
كەزدەسۋگە دەيىن Reuters اگەنتتىگى ۋكراينالىق جانە امەريكالىق شەنەۋنىكتەر رەسەيمەن اۋە كەڭىستىگىندەگى ءبىتىم تۋرالى ۇسىنىستى تالقىلاپ جاتقانىن حابارلاعان ەدى. بۇل باستاما ەكى تاراپتىڭ دا اۋە شابۋىلدارىن توقتاتۋىن كوزدەيدى. اگەنتتىك مالىمەتىنشە، ۇسىنىستار كەيىن ماسكەۋگە جولدانۋى مۇمكىن.
«سونداي-اق ديپلوماتيا ماسەلەسىن تالقىلادىق. ديپلوماتيالىق ۇدەرىستى جانداندىرۋ ماڭىزدى»، – دەپ جازدى زەلەنسكي.
ونىڭ سوزىنشە، ەكى ەلدىڭ كەلىسسوز جۇرگىزۋشى توپتارى الداعى بايلانىستاردىڭ ەگجەي-تەگجەيىن كەلىسىپ جاتىر.
زەلەنسكي اق ۇيدەن جاريالاعان فوتوسۋرەتتەردە ونىڭ كەڭسەسىنىڭ باسشىسى اندرەي ەرماك، ورىنباسارى پاۆەل پاليسا، ۋكراينا سىرتقى ىستەر ءمينيسترىنىڭ مىندەتىن اتقارۋشى اندرەي سيبيگا، ورىنباسارى سەرگەي كيسليتسا جانە اقش-پەن كەلىسسوزدەردەگى نەگىزگى وكىلدەردىڭ ءبىرى رۋستەم ۋمەروۆ تا كورىنەدى.
وتكەن اپتادا زەلەنسكي اقش پرەزيدەنتىنىڭ ارنايى وكىلدەرى ستيۆ ۋيتكوفف پەن دجارەد كۋشنەرمەن رەسەيمەن بەيبىت كەلىسسوزدەردى قايتا جانداندىرۋ مۇمكىندىكتەرىن تالقىلاعان بولاتىن.
سەيسەنبى كۇنى كەشىرەك ۋكراينا پرەزيدەنتى الەۋمەتتىك جەلىدە Patriot جۇيەلەرىنە جانە وزگە دە قارۋ-جاراق تۇرلەرىنە ارنالعان زىمىراندار شىعاراتىن Lockheed Martin كومپانياسىنىڭ وكىلدەرىمەن دە كەزدەسكەنىن حابارلاعان ەدى.
