«سۇڭقار» زىمىران تاسىعىشىنىڭ العاشقى سىناق ۇشىرىلىمى 13–16 ءساۋىر ارالىعىندا جۇزەگە اسىرىلۋى مۇمكىن، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
4 ساۋىرگە جوسپارلانعان ۇشىرىلىم قوسىمشا تەحنيكالىق تەكسەرىستەر جۇرگىزۋ قاجەتتىلىگىنە بايلانىستى كەيىنگە شەگەرىلگەن. قازىرگى ۋاقىتتا ستارتتىق كەشەن مەن زىمىران جۇيەلەرى تولىق تەكسەرىلىپ جاتىر. بارلىق ەسكەرتۋلەر جويىلعان سوڭ، ناقتى ۇشىرۋ كۇنىن مەملەكەتتىك كوميسسيا بەكىتەدى.
ايتا كەتەيىك، زىمىراندى العاش رەت 27 ناۋرىزدا ۇشىرۋ جوسپارلانعان ەدى. سودان بەرى التىنشى مارتە شەگەرىلىپ وتىر. الايدا تەحنيكالىق سەبەپتەرگە بايلانىستى مەرزىم بىرنەشە رەت كەيىنگە قالدىرىلدى. 31 ناۋرىز كۇنى «سۇڭقار» زىمىرانى پايدالى جۇكتەمەنىڭ ماكەتىمەن بىرگە مونتاجداۋ-سىناق كورپۋسىنان ستارتتىق الاڭعا شىعارىلىپ، تىك كۇيدە ورناتىلدى.
زىمىران ۇشاتىن "بايتەرەك" عارىشتىق زىمىران كەشەنى – قازاقستان مەن رەسەيدىڭ بىرلەسكەن جوباسى. بايقوڭىرداعى №45 ۇشىرۋ الاڭى نەگىزىندە جاساقتالعان جوبا ەكولوگيالىق تازا وتىنمەن جۇمىس ىستەيتىن زىمىرانداردى ۇشىرۋعا ارنالعان ينفراقۇرىلىم قۇرۋ ماقساتىن كوزدەيتىنى ايتىلادى. جوبا 2004 جىلى باستالىپ، 2005 جىلى سول كەزدەگى پرەزيدەنتتەر نۇرسۇلتان نازارباەۆ پەن ۆلاديمير ءپۋتيننىڭ قاتىسۋىمەن رەسمي تۇردە ىسكە قوسىلعان بولاتىن.
ايتا كەتۋ كەرەك، رەسەيدە — «سويۋز-5»، قازاقستاندا «سۇڭقار» اتالاتىن بۇل الىپ قۇرال — ورتا كلاستى، ەكى ساتىلى زىمىران. ول ەكولوگيالىق قاۋىپسىز وتىن — نافتيل مەن سۇيىق وتتەگىن پايدالانادى. جوبا ءساتتى جۇزەگە اسقان جاعدايدا، قازاقستاننىڭ عارىش سالاسىنداعى الەۋەتىن ارتتىرىپ، حالىقارالىق ۇشىرۋ نارىعىنداعى ورنىن كۇشەيتۋگە مۇمكىندىك بەرەدى دەپ حابارلانعان.
بۇعان دەيىن رەسەيلىك باق-تىڭ زىمىران اتاۋىنا قاتىستى پىكىر جاريالاعان ەدىك. ال بىلتىر بايقوڭىرداعى گاگارين ستارت الاڭىنىڭ ورنىنان كونە وركەنيەت وشاعى تابىلعانى حابارلانعان بولاتىن.
