AQŞ prezidentı Donald Tramp pen Ukraina prezidentı Vladimir Zelenskiidıŋ Aq üidegı kezdesuı şamamen bır saǧatqa sozyldy, dep habarlaidy «Adyrna» tılşısı BBC-ge sılteme jasap.
Būl soŋǧy ekı aidaǧy ekı prezidenttıŋ üşınşı jeke kezdesuı boldy. Kezdesu jabyq formatta, būqaralyq aqparat qūraldarynyŋ qatysuynsyz ötken.
Zelenskii Tramppen ötken äŋgımenı jaqsy baǧalady.
«Sopaq kabinette prezident Tramppen jaqsy kezdesu öttı. Ukrainalyqtardyŋ ömırın qorǧau jäne beibıtşılıkke qol jetkızu jolynda bırlesıp atqaryp jatqan jūmystarymyz üşın alǧys aitamyn», – dep jazdy ol Aq üiden şyqqannan keiın äleumettık jelıde.
Keiınırek Aq üidıŋ baspasöz hatşysy Kerolain Levitt Tramptyŋ Zelenskiimen jäne İzrail premer-ministrı Biniamin Netaniahumen (ol Ukraina prezidentınen keiın bırden Aq üige kelgen – red.) kezdesulerın «oŋ ärı nätijelı» dep sipattady. Al Tramptyŋ özı būl kezdesuler turaly äzırge pıkır bıldırgen joq.
Zelenskiidıŋ aituynşa, taraptar Patriot keşenderıne arnalǧan tosqauyldauşy zymyrandardy öndıru lisenziialaryn jäne «kömek bere alatyn basqa da ideialardy» talqylaǧan. Alaida ol naqty qandai bastamalar söz bolǧanyn aşyp aitpady.
Kezdesuge deiın Reuters agenttıgı ukrainalyq jäne amerikalyq şeneunıkter Reseimen äue keŋıstıgındegı bıtım turaly ūsynysty talqylap jatqanyn habarlaǧan edı. Būl bastama ekı taraptyŋ da äue şabuyldaryn toqtatuyn közdeidı. Agenttık mälımetınşe, ūsynystar keiın Mäskeuge joldanuy mümkın.
«Sondai-aq diplomatiia mäselesın talqyladyq. Diplomatiialyq üderıstı jandandyru maŋyzdy», – dep jazdy Zelenskii.
Onyŋ sözınşe, ekı eldıŋ kelıssöz jürgızuşı toptary aldaǧy bailanystardyŋ egjei-tegjeiın kelısıp jatyr.
Zelenskii Aq üiden jariialaǧan fotosuretterde onyŋ keŋsesınıŋ basşysy Andrei Ermak, orynbasary Pavel Palisa, Ukraina syrtqy ıster ministrınıŋ mındetın atqaruşy Andrei Sibiga, orynbasary Sergei Kislisa jäne AQŞ-pen kelıssözderdegı negızgı ökılderdıŋ bırı Rustem Umerov ta körınedı.
Ötken aptada Zelenskii AQŞ prezidentınıŋ arnaiy ökılderı Stiv Uitkoff pen Djared Kuşnermen Reseimen beibıt kelıssözderdı qaita jandandyru mümkındıkterın talqylaǧan bolatyn.
Seisenbı künı keşırek Ukraina prezidentı äleumettık jelıde Patriot jüielerıne jäne özge de qaru-jaraq türlerıne arnalǧan zymyrandar şyǧaratyn Lockheed Martin kompaniiasynyŋ ökılderımen de kezdeskenın habarlaǧan edı.
