جاپونيانىڭ وڭتۇستىگىندە 28 شىلدەدە بولعان جەر سىلكىنىسى سالدارىنان كەمىندە 13 ادام قازا تاپتى. بۇل تۋرالى ەل پرەمەر-ءمينيسترى ساناە تاكايتي مالىمدەدى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
«13 ادام كوز جۇمدى»، – دەدى ول جۋرناليستەرگە.
قايعىلى وقيعا تىركەلگەن كۋماموتو پرەفەكتۋراسى بيلىگىنىڭ مالىمەتىنشە، 10 مىڭعا جۋىق ادام ەۆاكۋاتسيالانعان. سونداي-اق 37 مىڭعا جۋىق ءۇي شارۋاشىلىعى ەلەكتر قۋاتىنسىز قالعان.
جەر سىلكىنىسىنىڭ ماگنيتۋداسى 7,1 باللدى قۇراعان. تابيعي اپات سەيسەنبى كۇنى جەرگىلىكتى ۋاقىت بويىنشا ساعات 16:27-دە كيۋسيۋ ارالىنىڭ ىشكى بولىگىندە بولعان.
بيلىك جوعالعاندار سانى مەن جەر سىلكىنىسىنەن قاتتى زاقىمدانعان ساۋدا ورتالىعى عيماراتىندا قالىپ قويۋى مۇمكىن ادامدار تۋرالى اقپاراتتى ءالى دە ناقتىلاپ جاتىر.
اپاتتان كەيىن كوپ ۇزاماي توكيوداعى كەڭسەسىندە جۋرناليستەر الدىندا سويلەگەن ساناە تاكايتي ءزىلزالا سالدارىنان جولدار مەن كوپىرلەردىڭ زاقىمدانعانىن جەتكىزدى.
ايتا كەتەيىك، جاپونيا الەمدەگى ەڭ سەيسميكالىق قاۋىپتى ەلدەردىڭ ءبىرى سانالادى.
