جاپونيانىڭ كيۋسيۋ ارالىنداعى كۋماموتو پرەفەكتۋراسىندا ماگنيتۋداسى 7,1 بولاتىن جويقىن جەر سىلكىنىسىنەن قازا تاپقاندار سانى 34 ادامعا جەتتى، دەپ حابارلايدى "ادىرنا" ءتىلشىسى.
جاپونيانىڭ تابيعي اپاتتارعا دەن قويۋ جونىندەگى شتابىنىڭ مالىمەتىنشە، ياتسۋسيرو قالاسىنداعى Nippon Paper Industries زاۋىتىندا مۇرجانىڭ قۇلاۋى سالدارىنان سەگىز ادام كوز جۇمعان. سونداي-اق كاسيما قالاسىنداعى AEON Mall Kumamoto ساۋدا ورتالىعىندا قۇتقارۋشىلار ءۇيىندى استىنان ەكى ادامدى تاپقان، ولاردىڭ ءبىرى قايتىس بولعان. وسىلايشا، اتالعان ساۋدا ورتالىعىنداعى قۇرباندار سانى بەس ادامعا جەتتى.
رەسمي دەرەك بويىنشا، تابيعي اپات سالدارىنان 66 ادام ءتۇرلى دارەجەدە جاراقات العان. ونىڭ ىشىندە 39 ادام اۋىر، 5 ادام ورتاشا، ال 22 ادام جەڭىل جاراقات العان. قازىر ياتسۋسيرو قالاسىندا قيراعان تۇرعىن ۇيلەردىڭ استىندا قالىپ قويعان ادامداردى ىزدەستىرۋ-قۇتقارۋ جۇمىستارى جالعاسىپ جاتىر.
كۋماموتو پرەفەكتۋراسىندا 415 ەۆاكۋاتسيالىق ورتالىق اشىلىپ، وندا 10 400-دەن استام تۇرعىن ورنالاستىرىلعان. سونىمەن قاتار شامامەن 74,8 مىڭ ءۇي اۋىزسۋسىز، ال 23 مىڭعا جۋىق ءۇي ەلەكتر جارىعىنسىز قالىپ وتىر.
جەر سىلكىنىسىنىڭ سالدارىنان تۇرعىن ۇيلەر، جولدار مەن كوپىرلەرگە ايتارلىقتاي زاقىم كەلگەن. تابيعي اپاتتىڭ زارداپتارىن جويۋ جۇمىستارىنا شامامەن 4,6 مىڭ اسكەري قىزمەتكەر جۇمىلدىرىلعان.
