پەتروپاۆل قالاسىندا ءدىني الاۋىزدىقتى قوزدىرۋ ءىسى بويىنشا سوت ۇكىمى شىقتى، دەپ حابارلايدى "ادىرنا" ۇلتتىق پورتالى Newtimes-قا سىلتەپ.
سوت ماتەريالدارىنا سايكەس، 50 جاستاعى ارمان احمەتوۆ الەۋمەتتىك جەلىدە ءدىني ارازدىقتى قوزدىرۋعا باعىتتالعان جازبالاردى بىرنەشە رەت جاريالاعان. ايىپتاۋ تاراپىنىڭ مالىمەتىنشە، ول يسلام ءدىنىنىڭ قازاق حالقىنا قاتىسى جوق ەكەنىن ايتىپ، مۇحاممەد پايعامبارعا قاتىستى قورلايتىن پىكىرلەر جاريالاعان.
سوتتالۋشىنىڭ مۇددەسىن ەكى ادۆوكات قورعادى. قورعاۋشى تاراپ قوسىمشا سوتتىق ءدىنتانۋ ساراپتاماسىن تاعايىنداۋدى سۇراعانىمەن، سوت بۇل ءوتىنىشتى قاناعاتتاندىرمادى.
سوت وتىرىسى بارىسىندا پروكۋراتۋرا سوتتالۋشىمەن پروتسەستىك كەلىسىم جاساۋ تۋرالى ۇسىنىستان دا باس تارتتى.
سوت شەشىمىمەن ارمان احمەتوۆ قىلمىستىق كودەكستىڭ ءدىني الاۋىزدىقتى قوزدىرۋعا قاتىستى بابى بويىنشا كىنالى دەپ تانىلىپ، 6 جىلعا باس بوستاندىعىنان ايىرىلدى.
ۇكىم زاڭدى كۇشىنە ءالى ەنگەن جوق.
