ەكاتەرينبۋرگ ماڭىندا اۆتوكولىك جارىلىپ، «ۋرالدرونزاۆود» كومپانياسىنىڭ باس ديرەكتورى ۆلاديمير تكاچۋك جاراقات الدى. بۇل تۋرالى 5 تامىزدا 66.ru جازدى، دەپ حابارلايدى «ادىرنا» ءتىلشىسى.
باسىلىمنىڭ جازۋىنشا، تكاچۋك قاستاندىق سالدارىنان جاراقات الىپ، اۋرۋحاناعا جەتكىزىلگەن. تاسس اگەنتتىگى ونىڭ جانساقتاۋ بولىمىندە اۋىر حالدە جاتقانىن جانە دارىگەرلەر ءومىرى ءۇشىن كۇرەسىپ جاتقانىن حابارلادى. وقيعاعا بايلانىستى ادام ولتىرۋگە قوعامدىق قاۋىپتى تاسىلمەن وقتالۋ بابى بويىنشا قىلمىستىق ءىس قوزعالعان. ال ونىڭ جۇرگىزۋشىسى وقيعا ورنىندا قازا تاپقان.
سۆەردلوۆ وبلىسىندا ورنالاسقان «ۋرالدرونزاۆود» كاسىپورنى رەسەيدىڭ ۋكرايناعا قارسى سوعىسىندا قولدانىلىپ جۇرگەن «ۋپىر» ۇلگىسىندەگى ۇشقىشسىز اپپاراتتاردى شىعارادى. The Insider باسىلىمىنىڭ مالىمەتىنشە، ۆلاديمير تكاچۋك اسكەري ماقساتتاعى درونداردى ازىرلەۋدى 2020 جىلى قولعا العان. رەسەيدىڭ ۋكرايناعا قارسى تولىق اۋقىمدى سوعىسى باستالعاننان كەيىن ول مۇنداي اپپاراتتاردى قۇراستىراتىن تسەح سالعان.
بولجام بويىنشا، «ۋپىر» دروندارىنىڭ كورپۋسىنىڭ باسىم بولىگى 3D-پرينتەر ارقىلى جاسالادى. تكاچۋكتىڭ ايتۋىنشا، 2024 جىلدىڭ ناۋرىزىنا قاراي اپپاراتتىڭ شامامەن 60 پايىزى رەسەيدە وندىرىلگەن بولشەكتەردەن قۇراستىرىلعان. سول جىلدىڭ سوڭىندا كاسىپورىن ەۋرووداق سانكتسيالارىنا ىلىكتى.
بۇعان دەيىن تۋلا قالاسىندا درون ازىرلەيتىن تاعى ءبىر كومپانيا باسشىسىنا قاستاندىق جاسالعان بولاتىن. 29 شىلدەدە رەسەي ارمياسى ۋكرايناداعى سوعىستا پايدالاناتىن «وۆود» دروندارىن ازىرلەۋشى كومپانيانىڭ جەتەكشىسى اندرەي چەرەزوۆقا تۇرعىن ءۇي پودەزىندە وق اتىلعان. تۋلا وبلىسى بويىنشا رەسەي تەرگەۋ كوميتەتىنىڭ مالىمەتىنشە، شابۋىل سول جەردە جاسالعان. ال ريا نوۆوستي اگەنتتىگى قازىرگى ۋاقىتتا چەرەزوۆتىڭ جاعدايى تۇراقتى ەكەنىن حابارلادى.
