تايلاندتىڭ «يالا» فۋتبول كومانداسىنىڭ ويىنشىسى سوفۆان اۆاە ماتچ كەزىندە نايزاعاي ءتۇسىپ، قازا تاپتى. بۇل تۋرالى كلۋبتىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
Bernama باسىلىمىنىڭ مالىمەتىنشە، قايعىلى وقيعا 4 تامىز كۇنى سۋنگايكولوك قالاسىندا وتكەن ماتچ بارىسىندا بولعان. نايزاعاي الاڭنىڭ ورتاسىنا ءتۇسىپ، سالدارىنان بىرنەشە ادام زارداپ شەككەن. جەرگىلىكتى پوليتسيانىڭ حابارلاۋىنشا، 24 جاستاعى سوفۆان اۆاە وقيعا ورنىندا كوز جۇمعان.
«جەدەل مەديتسينالىق كومەك قىزمەتكەرلەرى بار كۇشىن سالعانىمەن، ويىنشىنى امان الىپ قالۋ مۇمكىن بولمادى»،–دەدى قۇقىق قورعاۋ ورگاندارىنىڭ وكىلى.
اقپاراتقا سايكەس، زارداپ شەككەندەردىڭ بارلىعى سۋنگاي گولوك اۋرۋحاناسىنا جەتكىزىلگەن. قازىرگى ۋاقىتتا پوليتسيا وقيعانىڭ ءمان-جايىن انىقتاۋ ءۇشىن تەرگەۋ جۇرگىزىپ جاتىر.
